ოთხი ამერიკელი კონგრესმენი საქართველოს საკითხზე წერილით მაიკ პომპეოსა და სტივენ მნუჩინს მიმართავს

სენატორი ტედ კრუზი, სენატორი ჯონ კორნინი, წარმომადგენელთა პალატის წევრები ჯოდი არინგტონი და მარკუეინ მალინი საქართველოს საკითხზე წერილით აშშ-ის სახელმწიფო მდივანს, მაიკ პომპეოს და ფინანსთა მინისტრ სტივენ მნუჩინს მიმართავენ. Imedinews-ი წერილის სრულ თარგმანს გთავაზობთ.

„ჩვენ გწერთ, რათა შეშფოთება გამოვთქვათ საქართველოში კარგი მმართველობის გაუარესების და პოტენციურად უკანონო ფინანსური საქმიანობის შესახებ. სულ უფრო მეტად ვარ შეშფოთებულნი საქართველოს კავშირით ამერიკისადმი მტრულად განწყობილ მეტოქეებსა და მტრებთან, რაც ჩვენს გეოსტრატეგიულ და ბიზნეს-ინტერესებს აზარალებს. გასული წლის განმავლობაში, საქართველოში უცხოური პირდაპირი ინვესტიციები თითქმის 50%-ით შემცირდა, ხოლო დასავლური ბიზნესებისთვის გადასახადები და ბიუროკრატიული ბარიერები გაიზარდა.

„კარგი მმართველობის ამ პრობლემებმა ამერიკული კომპანიების ფუნქციონირების უნარს და საქართველოსთან ჩვენი ურთიერთობის გაღრმავებას პრობლემები შეუქმნა. ტეხასური კომპანია „ფრონტერა“ საქართველოში აშშ-ის უმსხვილესი ინვესტორია ნავთობისა და გაზის სექტორში. ნავთობისა და გაზის აღმოჩენაში მათ 500 მილიონზე მეტი დოლარის ინვესტიცია ჩადეს. რეგულაციებით და შეზღუდვებით „ფრონტერა“ მიზანში ამოიღეს და ახლა მას საქართველოს ხელისუფლების მიერ შესაძლო კონფისკაცია ემუქრება. 2019 წელს სხვა ამერიკული კომპანია, Conti Group მსგავსი მეთოდებით გააგდეს კონსორციუმიდან, რომელიც ანაკლიაში საპორტო ობიექტს აშენებს, და პროექტი შეჩერდა.

ამ გართულებებსა და დავებს უკან გეოპოლიტიკური საკითხები დგას. „ფრონტერას“ სამუშაოების მიზანი საქართველოს სტაბილურობისა და ენერგოდამოუკიდებლობის მიღწევა იყო, ხოლო ანაკლიაში პორტის მშენებლობის პროექტი რუსეთის საპორტო ინფრასტრუქტურაზე საქართველოს დამოკიდებულების შემსუბუქებას ისახავდა მიზნად.

ლეგალური ბიზნესის ქვეყნიდან გაგდების შემდეგ მისი ადგილი უკანონო ვაჭრობამ დაიკავა. წლების განმავლობაში ქართული ბიზნესი და საქართველოს ფინანსური სისტემა აშშ-ის ოფიციალური პირებისთვის ცნობილი იყო, როგორც ანტიირანული სანქციების გვერდის ავლის საშუალებები, რაც სულ მცირე 2013 წელში გვაბრუნებს, როდესაც ჩვენმა ხელისუფლებამ გაიგო, რომ სამმა ირანელმა ბიზნესმენმა კონტროლი დაამყარა თბილისში მცირე საბანკო ინსტიტუტზე და ისინი მას ფულის გადასარიცხად და სხვა საქმიანობისთვის იყენებდნენ, რაც მოიცავდა ფულის გადაცვლას, კომპანიებს შავი ზღვის სანაპიროზე და ავიაკომპანიასაც კი. ქვეყნის დასავლური ორიენტაცია, მის პორტებთან ერთად, ირანელებისთვის იდეალური სამიზნეა. რეალურად, ბოლო ცნობებით, ბათუმის პორტი კვლავ ირანის უკანონო ნავთობაქტივობების სამიზნეა.

ვითხოვთ, ჩატარდეს ბრიფინგს შემდეგ საკითხებზე:

• საქართველოს ამჟამინდელი მთავრობა, რომლის სათავეშიც არის პარტია „ქართული ოცნება“, ჩართულია ლეგიტიმური ამერიკული ბიზნესების შევიწროებაში, რომლებმაც საქართველოს ეკონომიკასა და მომავალში ჩადეს ინვესტიცია.
• ნებისმიერი ასეთი ქმედება მოტივირებულია გეოპოლიტიკური მოსაზრებებით, მათ შორის, "ქართული ოცნების" თავმჯდომარის, ბიძინა ივანიშვილის სავარაუდო კავშირებით რუსეთის მთავრობასთან.
• საქართველოში შავი ზღვის პორტებთან დაკავშირებული საქმიანობა საფრთხეს უქმნის ამერიკის ეროვნული უსაფრთხოების ინტერესებს.

საქართველო კავკასიაში სტრატეგიული პარტნიორია და NATO-ს მოკავშირეობისკენ ისწრაფვის. სამხედრო თვალსაზისით, ქართველებმა შეიტანეს წვლილი ავღანეთში აშშ-ის მისიაში. გეოპოლიტიკურად საქართველო აშშ-ს სთავაზობს მნიშვნელოვან გზას კასპიის ზღვიდან აღმოსავლეთ ევროპამდე ვაჭრობისა და ენერგორესურსებისთვის.

აშშ-საქართველოს ძლიერი პარტნიორობა ამერიკული ინტერესებისთვის აუცილებელია, რაც, თავის მხრივ, მოითხოვს, რომ საქართველო დაუბრუნდეს კარგ მმართველობას და წაახალისოს ის. ჩახლართული გეოსტრატეგიული და ბიზნესინტერესები ფედერალური მთავრობისგან ფართო პასუხს მოითხოვს და, როგორც ყოველთვის, ჩვენ მზად ვართ მოგაწოდოთ რესურსები, რომლებიც ამერიკის ეროვნული ინტერესის დასამტკიცებლად და დასაცავად გჭირდებათ“, - წერენ კონგრესმენები.