მაიკ პომპეო რუსეთის მიერ „ღია ცის შეთანხმების“ დარღვევის ერთ-ერთ მაგალითად საქართველოს ოკუპირებული რეგიონების გასწვრივ სადამკვირვებლო ფრენების არდაშვებას მიიჩნევს

რუსეთმა უარი თქვა, დაეშვა სადამკვირვებლო ფრენა საქართველოს ოკუპირებულ რეგიონებთან, აფხაზეთთან და ე.წ. „სამხრეთ ოსეთთან“ თავისი საზღვრის გასწვრივ, 10-კილომენტრიანი დერეფნის ფარგლებში და ამგვარად ცდილობდა, გამოეთქვა ყალბი პრეტენზია, თითქოს ეს ოკუპირებული ტერიტორიები დამოუკიდებელი სახელმწიფოებია.

ამის შესახებ ამერიკის სახელმწიფო მდივნის განცხადებაშია ნათქვამი, რომელიც „ღია ცის შეთანხმებიდან“ შეერთებული შტატების გასვლის გადაწყვეტილებას ეხება.

მაიკ პომპეოს განცხადებით, შეერთებული შტატები დღეს „ღია ცის შეთანხმების“ დეპოზიტარებს და ყველა მონაწილე სახელმწიფოს ოფიციალურად შეატყობინებს შეთანხმებიდან გასვლის გადაწყვეტილების შესახებ და 6 თვის შემდეგ შეთანხმების მონაწილე მხარე აღარ იქნება.

მიზეზად ამერიკის სახელმწიფო მდივანი რუსეთის მხრიდან შეთანხმების არაერთგზის დარღვევას ასახელებს. მათ შორის, ანექსირებულ ყირიმში საწვავის გამართვის მიზნით აეროდრომის მოწყობას, ასევე, კალინინგრადის თავზე სადამკვირვებლო ფრენის შეზღუდვას. ის, რომ შეერთებული შტატები „ღია ცის შეთანხმებას“ ტოვებს, გვიან ღამით თეთრი სახლის ლიდერმაც დაადასტურა. შეთანხმება, რომელიც 35 სახელმწიფოს აერთიანებს, 1992 წელს ჰელსინკიში გაფორმდა. ხელშეკრულების ფარგლებში, ამ ქვეყნების ავიაციას შეუძლია, სხვა სახელმწიფოების ტერიტორიაზე სადამკვირვებლო ფრენა განახორციელოს.