ირაკლი კობახიძე: ერთი ოპოზიციური პარტია 12%-იანი, მეორე კი 3%-იანია - ასეთ პირობებში მათთვის არჩევნებმა აზრი დაკარგა

საპარლამენტო უმრავლესობის წევრის, „ქართული ოცნების“ აღმასრულებელი მდივნის, ირაკლი კობახიძის განცხადებით, საკონსტიტუციო ცვლილებების პირველი საჯარო განხილვა 4 ივნისს, საზოგადოებრივი მაუწყებლის, მეორე კი 13 ან 14 ივნისს აჭარის ტელევიზიით გადაიცემა. მისივე თქმით, დღეს გაიმართა საკონტიტუციო ცვლილებების საყოველთაო სახალხო განხილვის საორგანიზაციო კომისიის სხდომა, რომელზეც იმსჯელეს იმაზე, თუ როგორ უნდა წარიმართოს საყოველთაო-სახალხო განხილვა.

„განხილვა, სავარაუდოდ, ივნისის შუა რიცხვებში დასრულდება, რაც მოგვცემს იმის საშუალებას, რომ უკვე 21 ივნისისთვის გავიტანოთ პირველ მოსმენაზე კანონპროექტი პარლამენტში და 29 ივნისს, სავარაუდოდ, უკვე სამივე მოსმენით იქნება კანონპროექტი მიღებული. რაც შეეხება იმას, თუ ვის აწყობს ეს ცვლილებები, მათემატიკურად აწყობს ოპოზიციას, იქიდან გამომდინარე, რომ ამ ცვლილებების საფუძველზე ისინი მიიღებენ მეტ მანდატს პარლამენტში, ვიდრე მიიღებდნენ 77/73-ის პირობებში. თუმცა, რეალობაა ასევე ისიც, რომ არჩევნებს მათთვის აზრი აქვს დაკარგული. ყველა შემთხვევაში - იქნება ეს 77/73-ზე თუ 120/30-ზე, ისინი მარცხისთვის არიან განწირულები. შესაბამისად, ისინი გადართულნი არიან დესტრუქციაზე. როგორც ვიცი, არ აპირებენ საორგანიზაციო კომისიის მუშაობაში მონაწილეობას. გიორგი რურუა არის საბაბი, მიზეზი კი არის ის, რომ ისინი არჩევნებში აზრს ვერ ხედავენ, იქიდან გამომდინარე, რომ ერთი არის 12%-იანი პარტია, მეორე კი 3%-იანი პარტია. ასეთ პირობებში არჩევნებმა მათთვის აზრი დაკარგა“, - განაცხადა ირაკლი კობახიძემ.

საკონსტიტუციო ცვლილებების პროექტის მიხედვით, 2020 წლის საპარლამენტო არჩევნების შედეგად, უმაღლესი საკანონმდებლო ორგანო პროპორციული წესით არჩეული 120 დეპუტატისგან და 30 მაჟორიტარისგან დაკომპლექტდება.

საკონსტიტუციო ცვლილებების პროექტის პირველი საჯარო განხილვა 4 ივნისს, 10:30 საათზე, საზოგადოებრივი მაუწყებლის ეთერით გაიმართება.

ოპოზიცია და ხელისუფლება 8 მარტს 2020 წლის არჩევნების 120/30-ზე მოდელით ჩატარებაზე შეთანხმდნენ. შესაბამის შეთანხმებას მხარეებმა აშშ-ის ელჩის რეზიდენციაში გამართულ შეხვედრაზე მიაღწიეს. რა დოკუმენტებს მოაწერეს ხელი აშშ-ის საელჩოში გამართული შეხვედრის მონაწილეებმა, წაიკითხეთ ამ ბმულზე.