გიორგი გაჩეჩილაძე: ადამიანის უფლებებთან მიმართებაში იმდენად მძიმე მემკვიდრეობა გვაქვს, რომ სხვადასხვა ქვეყნის 30-40-იანი წლები მახსენდება

„უნდა მივესალმოთ იმ პროგრესს, რომელიც ადამიანის უფლებებთან დაკავშირებით დღევანდელ საქართველოშია, რასაც საერთაშორისო ორგანიზაციებიც აღიარებენ. ამ საკითხთან დაკავშირებით იმდენად მძიმე მემკვიდრეობა გვაქვს, რომ ხანდახან სხვადასხვა ქვეყნის 30-40-იანი წლების გამოცდილება მახსენდება. მე ვსაუბრობ, ბოლშევიკურ და ფაშისტურ რეჟიმებზე და ა.შ. თუ ჩვენ შევხედავთ იმ ციფრებს, რომლებიც ოფიციალურ მონაცემებში არსებობს, შეიძლება საერთაშორისო საზოგადოება გაოცებულიც კი დარჩეს, - ამის შესახებ განაცხადა ადამიანის უფლებათა დაცვისა და სამოქალაქო ინტეგრაციის კომიტეტის სხდომაზე ფრაქცია „ქართული ოცნება - მწვანეების“ თავმჯდომარემ, გიორგი გაჩეჩილაძემ.

მისივე თქმით, 2011 წელს დავოსის ფორუმზე გამოქვეყნდა კონკურენტუნარიანობის ყოველწლიური მოხსენება, სადაც კერძო საკუთრების დაცვის უფლების თვალსაზრისით საქართველო 140 ქვეყნიდან 134 ადგილზე იყო.

„ეს კატასტროფული მაჩვენებელი იყო. ჩვენ ვიცით, როგორ იბარებდნენ ხალხს, როგორ ართმევდნენ ქონებას როგორც ექცეოდნენ ბიზნესმენებს, კერძო მესაკუთრეებს, მაგრამ ასეთი სამარცხვინო ინდექსი ქვეყნის რეპუტაციისათვის ძალიან დამაზიანებელი იყო. ასევე, არსებობს გაეროს მოწყვლადობის მოხსენება საქართველოსთან დაკავშირებით, რომლის მიხედვით ოჯახების 54%-ში ერთი ქრონიკული დაავადების მქონე ადამიანი მაინც იყო და მათგან 90%-მდე ვერ მიდიოდა ექიმთან იმიტომ, რომ გადახდის საშუალება არ ჰქონდა და ეს ადამიანები უბრალოდ იღუპებოდნენ“, - განაცხადა გიორგი გაჩეჩილაძემ.

ფრაქცია „ქართული ოცნება - მწვანეების“ თავმჯდომარემ, გიორგი გაჩეჩილაძემ ასევე აღნიშნა, რომ წინა ხელისუფლების სისტემური დანაშაულებები, დამოკიდებულება ადამიანის და საზოგადოების მიმართ, წარსულს ჩაბარდა. მან იმედი გამოთქვა, რომ საზოგადოება და ის უამრავი ადამიანი, რომელმაც ეს კატასტროფა გაიარა, რეალურად შეაფასებს მდგომარეობას.

მისივე თქმით, პროკურატურაში 54 ათასი განაცხადია შეტანილი უფლებების აღდგენასთან დაკავშირებით და ამ საკითხების მოგვარებას სისტემური მიდგომა სჭირდება.​

პარლამენტში ადამიანის უფებათა ევროპული სასამართლოს გადაწყვეტილებების აღსრულების 2019 წლის ანგარიშზე მსჯელობენ. ადამიანის უფლებათა დაცვის კომიტეტის წევრებს ანგარიშს იუსტიციის მინისტრის მოადგილე, გოჩა ლორთქიფანიძე აცნობს. მინისტრის მოადგილე აღნიშნავს, რომ ევროპული სასამართლოს წინაშე საქართველოს წინააღმდეგ საქმეების რაოდენობა მკვეთრად შემცირდა და 2012-2020 წლებში ეს მაჩვენებელი 5-ჯერ ნაკლებია. დღევანდელ განხილვას „ნაციონალური მოძრაობისა“ და „ევროპული საქართველოს“ წარმომადგენლები არ ესწრებიან.