ევროკომისარი საქართველოს ხელისუფლებას აზერბაიჯანელი ჟურნალისტის საქმის დროულად გამოძიებას სთხოვს

ევროპის საბჭოს კომისარი ადამიანის უფლებების საკითხებში ნილს მუჟნიეკსი აზერბაიჯანელი ჟურნალისტისა და აქტივისტის, აფგან მუხტარლის გატაცებისა და დაპატიმრების ფაქტს სოციალურ ქსელში გამოეხმაურა. მუჟნიეკსი საქართველოს ხელისუფლებას მოუწოდებს, საქმის ეფექტიანი, სწრაფი და დამოუკიდებელი გამოძიება დაიწყოს.

"აღშფოთებული ვარ იმით, რაც ხდება აზერბაიჯანელი ჟურნალისტისა და აქტივისტის, აფგან მუხტარლისთან დაკავშირებით, რომელიც საქართველოდან გაიტაცეს და იძულებით გადაიყვანეს აზერბაიჯანში, სადაც საზღვრის უკანონოდ გადაკვეთისა და კონტრაბანდული გზით თანხის გადაზიდვის ბრალდებები წაუყენეს.

მუხტარლი საქართველოში 2015 წლიდან ცხოვრობდა. ის აზერბაიჯანი მთავრობის რეპრესიებს გაექცა.

მისი ადვოკატის თქმით, მუხტარლი ადასტურებს, რომ ფული ჯიბეში გამტაცებლებმა ჩაუდეს. ეს ძალიან სერიოზული ბრალდებაა, რომელსაც საქართველოს ხელისუფლების მხრიდან უნდა მოჰყვეს სასწრაფო რეგირება და უნდა დაიწყონ ეფექტიანი, სწრაფი და დამოუკიდებელი გამოძიება, რომლის შედეგების მიხედვითაც უნდა მიიღოს შესაბამისი საპასუხო ზომები. 

აზერბაიჯანის ხელისუფლებამ უნდა გაათავისუფლოს მუხტარლი დაუყოვნებლივ და ხელი შეუწყოს იმას, რომ ჟურნალისტის უფლებები იყოს დაცული", - წერს ევროკომისარი.
 

ჟურნალისტი აფგან მუხტარლი თბილისიდან 29 მაისს გაუჩინარდა. ის სახლიდან გავიდა და არ დაბრუნებულა. მოგვიანებით, ცნობილი გახდა, რომ ის ბაქოში გადაიყვანეს. დღეს ბაქოს მას საქალაქო სასამართლომ სამთვიანი წინასწარი პატიმრობა შეუფარდა. ჟურნალისტს აზერბაიჯანის პროკურატურამ ბრალი კონტრაბანდის, სახელმწიფო საზღვრის უკანონო გადაკვეთისა და პოლიციისთვის დაუმორჩილებლობის მუხლებით წარუდგინა.

აფგან მუხტარლის საქმესთან დაკავშირებით, საქართველოს შსს-მ გამოძიება დაიწყო საქართველოს სსკ-ს 143-ე მუხლით, რაც თავისუფლების უკანონო აღკვეთას გულისხმობს. სახელმწიფო უსაფრთხოების სამსახურის ხელმძღვანელის ვახტანგ გომელაურის განცხადებით, აზერბაიჯანელი ჟურნალისტი „მწვანე საზღვარზე“ დააკავეს და არა გამშვებ პუნქტზე. 

თუმცა, მუხტარლის ადვოკატს, ჟურნალისტებს და არასამთავრობო სექტორს არ სჯერა, რომ მისი საქართველოში მოტაცება და აზერბაიჯანში გადაყვანა ქართული სპეცსამსახურების დახმარების თუ მათი უმოქმედობის გარეშე მოხდა. თბილისში, აზერბაიჯანელი ჟურნალისტის მხარდასაჭერი აქციები იმართება.

მუხტარლის დაკავების ფაქტს საერთაშორისო უფლებადამცველი ორგანიზციები Human Right Watch-ი და Amnesty International-ი გამოეხმაურნენ.   

არსებული ინფორმაციით, აფგან მუხტარლის მოტაცებისა და აზერბაიჯანში მისი დევნის მიზეზი, ჟურნალისტური გამოძიებაა. ახლობლების თქმით, ჟურნალისტი საქართველოში ილჰამ ალიევის ოჯახის ბიზნესინტერესებზე მასალას ამზადებდა.

აზერბაიჯანელი აქტივისტი და ჟურნალისტი, მათ შორის "რადიო თავისუფლების" ყოფილი ჟურნალისტი დაახლოებით 2 წელია ოჯახთან ერთად საქართველოში ცხოვრობს. საქმიანობიდან გამომდინარე, მისი აზერბაიჯანში დარჩენა საფრთხეს წარმოადგენდა.