ქეთევან ციხელაშვილი: ბოლო 2 წლის განმავლობაში 40-მდე დახურულ შეხვედრაში ვმონაწილეობდი, რომელთა შინაარსზეც ხშირად ვერ ვსაუბრობთ

ბოლო 2 წლის განმავლობაში, 40-მდე დახურულ შეხვედრაში ვმონაწილეობდი, ისეთში, რომელსაც თავისთავად აქვს პოტენციალი გადაიზარდოს კიდევ უფრო ფართო დიალოგსა და სამშვიდობო პროცესში, - ამის შესახებ შერიგებისა და სამოქალაქო თანასწორობის საკითხებში სახელმწიფო მინისტრმა, ქეთევან ციხელაშვილმა განაცხადა.

მისივე თქმით, არც ერთ ეტაპზე ბოლო წლების განმავლობაში, მითუმეტეს 2008 წლიდან მოყოლებული, არ ყოფილა ამდენი ქართულ-აფხაზური და ქართულ-ოსური კონტაქტი ყველა დონეზე, როგორიც არის დღეს და ეს არის მოცემულობა.

„იზრდებოდა მავთულხართები, მაგრამ ამის პარალელურად იზრდებოდა ეს კონტაქტები. ხანდახან ისმის ხოლმე ერთეული კრიტიკა, როდესაც ამბობენ, რომ ეს კონტაქტები არ არის. იყენებენ რა იმ მოცემულობას, რომ ხშირად ამ კონტაქტებზე, შინაარსზე, შეხვედრების ადგილზე ვერ ვსაუბრობთ. პირადად მე, ბოლო 2 წლის განმავლობაში, 40-მდე დახურულ შეხვედრაში ვმონაწილეობდი, ისეთში, რომელსაც თავისთავად აქვს პოტენციალი გადაიზარდოს კიდევ უფრო ფართო დიალოგსა და სამშვიდობო პროცესში. ისინი ვინც გვაკრიტიკებენ, პირველი ალბათ ის კატეგორიაა, ვისაც არ აქვს ინფორმაცია და გასაგებია ობიექტურია, რადგან ყოველთვის საჯაროდ ვერ ვსაუბრობთ, მაგრამ არიან ადამიანები, ვინც ძალიან კარგად იციან, რომ ასეთი კონტაქტები არის ან შეიძლება იყოს. ზოგჯერ ეს პოლიტიკური დღის წესრიგით არის განპირობებული, ზოგჯერ სხვა დღის წესრიგით, არ ვიცი, როგორც ამბობენ ენას ძვალი არ აქვს. თუმცა, სასურველია, რომ შუბლს ჰქონდეს ძარღვი ამ შემთხვევაში.

ფაქტია, რომ ეს კონტაქტები არის და მუშაობს. არის შერიგების სერიოზული რესურსი. ეს არის საკითხი, რომლის ირგვლივაც დაუშვებელია პოლიტიკური სპეკულაციები, ვიწრო პოლიტიკურ ინტერესებში გამოყენება, რასაც, სამწუხაროდ, ხშირად ვაწყდებოდით ამ 8 წლის განმავლობაშიც. ჩემი თხოვნაა და დიდი სურვილიც, რომ ასეთ სახელმწიფოებრივ საკითხებს ჩვენ მივუდგეთ ცოტა სხვაგვარად, უფრო მაღალი სახელმწიფოებრივი შეგნებით.
მთავარი მონაპოვარი ალბათ ჩემი კაბინეტის წევრად ყოფნის დროს ეს არის „ნაბიჯი უკეთესი მომავლისკენ“ - კონკრეტული, კომპლექსური სამშვიდობო გეგმა და საგზაო რუკა იმისა, თუ როგორ უნდა წავიდეთ ჩვენ წინ, როგორ უნდა შევქმნათ ფუნდამენტი შერიგებისთვის, დიალოგისთვის, ნდობის შენებისთვის პრაგმატულ საფუძველზე. იმ საფუძველზე, რომელიც ქმნის შესაძლებლობებს ვაჭრობისთვის გამყოფი ხაზების გავლით, განათლებისთვის და სხვადასხვა სერვისის გავრცელებისთვის. ჩვენ ახალი გზები მოვძებნეთ. პარლამენტში იყო საკმაოდ ხანგრძლივი განხილვა და პარლამენტმა ერთსულოვნად ამას დაუჭირა მხარი. დღეს უამრავი კანონი და კანონქვემდებარე აქტი უმაგრებს ზურგს ამ ინიციატივას, რომელმაც ახლახანს დაიწყო მუშაობა და მის პოტენციალს მომავალში კიდევ უფრო მეტად დავინახავთ.

დღეისთვის ის გამოხმაურებები, რომლებიც აქვს „ნაბიჯი უკეთეს მომავალს“, არ ვგულისხმობ შიდა საზოგადოებას და არც ჩვენ მეგობრებს, რომელთაც ამ ტირუბუნიდან უდიდეს მადლობას ვუხდი, რადგან ყველა უმაღლეს ტრიბუნაზე, ყველა რეზოლუციაში ერთხმად საქართველოს მხარდამჭერ განცხადებებში აღნიშნული იყო, ამ გეგმის მნიშვნელობა, ჩემთვის ყველაზე მნიშვნელოვანია გამოხმაურებები, რომლებიც გვაქვს უკვე დღეს აფხაზური და ოსური საზოგადოებებიდან. უამრავი შეხვედრა, რომელიც მათი ინიციატივით შედგა, სხვათაშორის კოვიდის ფონზეც, ეხლა ყველა გადართული ვართ ვიდეოფორმატზე, გარკვეულ პროექტებზე, კონკრეტულ პროექტებზე, სავაჭრო პროექტებზე განსაკუთრებით, ამ კვირებშიც ვსაუბრობთ. ინტერესი არსებობს, მაღალია, კონკრეტულია, სახელი და გვარი აქვს, მაგრამ ვერ გეტყვით. გვარები და არაერთი გვარი. ინტერესი გამოიხატა იმითაც, რომ მცირე გრანტების მიმართ, ეს პროგრამა პირველად გავხსენით ჩვენ, 27 წლის განმავლობაში ასეთი რამ არ ყოფილა და სრულიად უპრეცედენტო შესაძლებლობა შევქმენით ეკონომიკური საქმიანობისთვის გამყოფი ხაზების გასწვრივ ვაჭრობასთან დაკავშირებით. მივიღეთ 20-ჯერ მეტი განაცხადი, ვიდრე მოველოდით და ვიდრე საპილოტე რესურსი გვქონდა. ანუ ასობით განაცხადი, სადაც ათასზე მეტი ადამიანი მონაწილეობს პირველივე ჯერზე. მათ შორის არიან ეთნიკურად ქართველები გალიდან და ახალგორიდან, მაგრამ არამხოლოდ. არიან აფხაზები, არიან ოსები, ზოგიერთი მათგანი თბილისშიც ყოფილა ამ თვეების და წლების განმავლობაში დახურულ შეხვედრებზე. ზოგს მესამე ქვეყანაში ვხვდებით. მთავარია, რომ სურვილი არსებობს პრაგმატული თანამშრომლობის, დიალოგის, შერიგების, რა თქმა უნდა ხელისშემშლელი ფაქტორები, ყველამ ვიცით რა სახელი აქვს ამას, დეზინფორმაცია, მაგრამ პოსტკოვიდ ფაზაში ოკუპირებულტერიტორიებისთვის ჩვენი პასუხი არის „ნაბიჯი უკეთესი მომავლისკენ.“

ყველა იმ ადამიანს მინდა მადლობა გადავუხადო, ვინც თანაშრომლობდა, განსაკუთრებით აფხაზეთში, ცხინვალში, გალში, ახალგორში, გამყოფ ხაზებზე, ქვემო ქართლში, სამცხე-ჯავახეთში, კახეთში, პანკისში, საქართველოს ნებისმიერ კუთხეში ჩვენს დევნილებს, ადამიანებს, რომლებსაც აქვთ პრობლემები, განსაკუთრებით მათ, ვისაც კონფლიქტი აწუხებთ ყოველდღიურ ცხოვრებაში. ბევრი არის ყოველდღიურობის გმირი. დღეს არ ვიცით მათი სახელები. ჩვენი პედაგოგები გალში, ექიმები. ეს ხალხი ჩადის გმირობას. იმედია, დადგება დღე, როდესაც შესაბამისად მივაგებთ პატივს ყველა ამ ადამიანის წვლილს. ასე, რომ მადლობა და განვაგრძობ ჩემი საზოგადოების, ქვეყნის ინტერესების დაცვას უკვე ავსტრიაში. ჩემს შემცვლელთან დაკავშირებით, პრემიერ-მინისტრმა უკვე გააკეთა განცხადება, ის მიიღებს ამ გადაწყვეტილებას და გაგაცნობთ სულ ცოტა ხანში“, - განაცხადა ციხელაშვილმა.