სალომე სამადაშვილი: ერთიან საარჩევნო სიაზე თუ დაინტერესება არ არის, ეს პარტიების არჩევანია

მიხეილ სააკაშვილმა წარადგინა საკუთარი ხედვა და ჩვენი მხრიდან ამ ხედვასთან დაკავშირებით აზრთა სხვადასხვაობა არ არსებობს, მაგრამ, რა თქმა უნდა, ეს ისეთი წინადადებაა, რომელიც მოითხოვს სხვა პარტიების თანამონაწილეობას, - ამის შესახებ „ერთიანი ნაციონალური მოძრაობის“ წარმომადგენელმა, სალომე სამადაშვილმა ჟურნალისტებთან საუბრისას განაცხადა, რომელმაც კომენტარი გააკეთა მიხეილ სააკაშვილის ინიციატივაზე, ოპოზიციის საერთო სიასთან დაკავშირებით.

„ჩვენი პოზიცია ყოველთვის იყო, რომ ჩვენ უნდა დავაყენოთ პარტიული ინტერესები დღეს მეორე ადგილზე და მთავარი დღეს არის, გადავდგათ ის ნაბიჯები, რომლებიც მაქსიმალურად დაგვეხმარება ივანიშვილის რეჟიმის დამარცხებაში. დარწმუნებული ვარ, ერთიანი სიით თუ ისე, ოქტომბერში ჩვენ ამ ხელისუფლებას აუცილებლად დავამარცხებთ. ოპოზიციაში არსებობს სხვადახვა აზრი, როგორ ჯობს ამ მიზნის განხორციელება. მიხეილ სააკაშვილმა წარადგინა საკუთარი ხედვა და ჩვენი მხრიდან, ასე ვთქვათ, ამ ხედვასთან დაკავშირებით აზრთა სხვადასხვაობა არ არსებობს, მაგრამ, რა თქმა უნდა, ეს ისეთი წინადადებაა, რომელიც მოითხოვს სხვა პარტიების თანამონაწილეობას და თუ დაინტერესება არ არის, ეს არის არჩევანი იმ პარტიების, რომლებმაც უარი თქვეს ამ წინადადებაზე“, - განაცხადა სალომე სამადაშვილმა.

საქართველოს ყოფილმა პრეზიდენტმა მიხეილ სააკაშვილმა ოპოზიციურ პარტიებს ერთიანი საარჩევნო სიის შექმნისკენ 13 ივნისს მოუწოდა. ამის შესახებ მან Facebook-ზე გამოქვეყნებულ ვიდეომიმართვაში განაცხადა.

მისი თქმით, ერთიან მაჟორიტარ კანდიდატებზე შეთანხმება „ქართული ოცნების“ დასამარცხებლად საკმარისი არ არის, ამიტომ ოპოზიციონერებმა ამბიციები გვერდზე უნდა გადადონ და არჩევნებზე ერთიანი სიით წარდგნენ. სააკაშვილის თქმით, მისთვის სულ ერთია როგორ გადანაწილდება ადგილები, თუმცა ალბათ ეს პარტიების რეიტინგის და მხარდაჭერის მიხედვით უნდა მოხდეს.