დავით ზალკალიანი კონგრესმენ ბეიკონის განცხადებაზე: ეს წერტილს დაუსვამს სპეკულაციებს

განცხადება, რაც კონგრესმენმა გააკეთა, წერტილს დაუსვამს ამ თემაზე სპეკულაციებს, - ასე გამოეხმაურა საქართველოს საგარეო საქმეთა მინისტრი, დავით ზალკალიანი კონგრესმენ დონ ბეიკონის განცხადებას.

მისი თქმით, ეს განცხადება კიდევ ერთხელ ადასტურებს, რომ მსგავსი სახის დოკუმენტების შედგენის მეთოდოლოგია არის განსხვავებული და ის არ წარმოადგენს აშშ-ის მთავრობის ოფიციალურ პოზიციას, რომელიც ასევე ძალიან კარგად განმარტა საქართველოში აშშ-ის ელჩმა.

„იმ ანგარიშში, რომელზეც კონგრესმენი საუბრობს, არის ურთიერთგამომრიცხავი თეზისები. ერთი მხრივ, საუბარია აშშ-ის მხრიდან საქართველოს მზარდ მხარდაჭერაზე, ასევე იმაზე, რომ ჩვენი სტრატეგიული პარტნიორობა უმაღლეს ნიშნულზეა. მეორე მხრივ, არის ის წინადადება, რომელიც ამოვარდნილია კონტექსტიდან. ეს ყველაფერი კიდევ ერთხელ უსვამს ხაზს მსგავსი დოკუმენტების შედგენის სპეციფიკურ მეთოდოლოგიას, რაც კონგრესმენმა ბეიკონმაც დაადასტურა“, – განაცხადა დავით ზალკალიანმა.

„რესპუბლიკელმა“ კონგრესმენმა, დონ ბეიკონმა კომენტარი გააკეთა დოკუმენტზე, რომელშიც ბიძინა ივანიშვილი და ვიქტორ მედვედჩუკი რუსეთის პრეზიდენტის ახლო მოკავშირეებად არიან მოხსენიებულნი. გადაცემა Пограничная ZONA-სთვის მიცემულ ინტერვიუში კონგრესმენმა აღნიშნა, რომ დოკუმენტის ეს ნაწილი მას არ დაუწერია და საამისოდ ტექნიკური ექსპერტები აიყვანეს.

აშშ-ის რესპუბლიკელთა კვლევითმა კომიტეტმა ეროვნული უსაფრთხოების სტრატეგია​ გამოაქვეყნა, რომელშიც საქართველოზეც არის საუბარი.