გიორგი ვოლსკი: რატომ ამბობს კარპენტერი, რომ გიორგი რურუა პოლიტიკური ლიდერია, როცა ამას თვითონ რურუა არ ამბობს?

მაიკლ კარპენტერი არის ჟურნალისტი, ყოფილი სახელმწიფო მოხელე, რომელსაც ექსპერტობაზე აქვს პრეტენზია, - ამის შესახებ პარლამენტის თავმჯდომარის პირველმა მოადგილემ, გიორგი ვოლსკიმ „დღის ქრონიკაში“ განაცხადა.

მისი თქმით, ნებისმიერი ექსპერტის შემოჭრა ამ ვითარებაში, რაც არ უნდა ინფორმაცია ჰქონდეს, არ არის რეალისტური და არ არის დაფუძნებული იმ რეალობის აღქმაზე, რაც საქართველოშია.

„კარპენტერი ამბობს, რომ პრობლემის ერთხელ და სამუდამოდ გადასაწყვეტად გიორგი რურუა გამოუშვითო. ჩემთვის, თქვენთვის და ნებისმიერისთვის, სანამ სასამართლოს გადაწყვეტილება არ არის მიღებული, მასზე ლაპარაკი ცოტა ღირსებას შეურაცხყოფს. არის მთავარი თემა. არის საქართველო, რომელსაც აქვს უამრავი პრობლემა და უამრავი პრობლემისა და გამოწვევის მიუხედავად, შეინარჩუნა სტაბილურობა და განვითარების გადარჩენის პერსპექტივა პანდემიის პირობებში. ნებისმიერი ექსპერტის შემოჭრა ამ ვითარებაში, რაც არ უნდა ინფორმაცია ჰქონდეს, არ არის რეალისტური და არ არის დაფუძნებული იმ რეალობის აღქმაზე, რაც საქართველოშია. კარპენტერის კომენტარი უნდა შევაფასოთ სწორედ ასეთი განზომილებით. რატომ ამბობს, რომ რურუა პოლიტიკური ლიდერია? თვითონ არ ამბობს ადამიანი იმას, რომ ლიდერია. ან რატომ არის 800 დოლარით მოწილე საინფორმაციო საშუალების?! ამ თემას იყენებენ პოლიტიკური ჯგუფები და ბრძოლა, რომელიც მიმდინარეობს პოლიტიკურ ასპარეზზე, სწორედ ის არის, რომელშიც უნდა გაერკვეს საზოგადოება“, - განაცხადა გიორგი ვოლსკიმ.

მაიკლ კარპენეტრი საქართველოში წინასაარჩევნოდ შექმნილ მდგომარეობას გამოეხმაურება. აშშ-ის თავდაცვის მდივნის ყოფილმა მოადგილემ ამჯერად 8 მარტის შეთანხმების შესრულების აუცილებლობაზე გაამახვილა ყურადღება.

„ქართულმა ოცნებამ“ კომპრომისის შესაქები სურვილი აჩვენა, ახლა კი ოპოზიციის ლიდერი გიორგი რურუა უნდა გაათავისუფლოს და საკონსტიტუციო რეფორმა გაატაროს. ქართული დემოკრატია ძლიერია და ოქტომბერში კონკურენტული არჩევნებისგან სარგებელს მიიღებს“, - განაცხადა კარპენტერმა.

რამდენიმე წლის წინ, კარპენტერი უკრაინაში საქართველოს ყოფილი პრეზიდენტის, მიხეილ სააკაშვილის საქმიანობას უარყოფითად აფასებდა და აღნიშნავდა, რომ მისი ქმედებები ქვეყანაში კრემლის პოლიტიკის გატარებას უწყობს ხელს. „ამერიკის ხმისთვის“ მიცემულ ინტერვიუში ის სააკაშვილს „წინააღმდეგობრივ ფიგურას“ უწოდებდა.