ნინო ბურჯანაძე: არ არის გამორიცხული, რომ ცალკეულ კანდიდატებს მხარი დავუჭიროთ, მაგალითად ნიკა მელიას, რომელიც გაცილებით უფრო ნაკლები „ნაციონალია“ ვიდრე ნებისმიერი სხვა

დასახელებული კანდიდატები, რომელთა შესახებაც წინასწარი მსჯელობაა, მიუღებელი არ უნდა იყოს საზოგადოების დიდი ნაწილისთვის, მათ შორის პოლიტიკური სპექტრისთვის. ამის შესახებ „ერთიანი საქართველო - დემოკრატიული საქართველოს“ ლიდერმა, ნინო ბურჯანაძემ ჟურნალისტებს განუცხადა.

„არ არის გამორიცხული, რომ ცალკეულ კანდიდატებს მხარი დავუჭიროთ, მაგალითად ნიკა მელიას, რომელიც გაცილებით უფრო ნაკლები „ნაციონალია“ ვიდრე ნებისმიერი სხვა“, - აღნიშნა ნინო ბურჯანაძემ.

მისივე თქმით, ზოგადად ყველა ოპოზიციურ ლიდერთან იყო კანდიდატებზე მსჯელობა, ამიტომ დღეს წარმოდგენილი გვარები სიურპრიზი მისთვის არ იქნება.

„ყველა კოლეგის მხრიდან იყო მზაობა გამოთქმული, რომ ჩვენც გვყოლოდა მაჟორიტარი კანდიდატები, თუმცა პარტიაში მივიღეთ გადაწყვეტილება, რომ ვკონცეტრირდეთ საერთო კამპანიაზე და თბილისში არ წარმოვადგინოთ კანდიდატი.

რაც შეეხება ყველა კონკრეტულ კანდიდატს, არიან კანდიდატები, რომელთაც ღიად დავუჭერთ მხარს, არიან კანდიდატები, რომელთაც არ ვუჭერთ მხარს. ჯერ საბოლოო სია არ ჩამოყალიბებულა, ამიტომ ნუ მთხოვთ პასუხს იმაზე, ყველას დავუჭერ მხარს თუ ნაწილობრივ.

ნებისმიერ შემთხვევაში, მთავარი ამოცანა შესრულდება - ოპოზიცია ერთმანეთს არ დაუპირისპირდება და არ წაართმევს ხმებს. მთავარი ამოცანა იქნება, რომ „ქართულმა ოცნებამ“ ვერ შეძლოს მაჟორიტარების სრული ოკუპირება“, - განაცხადა ნინო ბურჯანაძემ.

ოპოზიცია „ლეიბორისტების“ ოფისში იკრიბება, სადაც მაჟორიტარი კანდიდატების დასახელება იგეგმება.

როგორც შეხვედრის დაწყებამდე „ევროპული საქართველოს“ ერთ-ერთმა ლიდერმა, დავით ბაქრაძემ ჟურნალისტებს განუცხადა, კონსულტაციების შედეგად მიღებული გადაწყვეტილების საფუძველზე 4 ოლქში კანდიდატურებს შესთავაზებენ.

მაგალითად, ვაკეში - ელენე ხოშტარია; მთაწმინდაზე - შალვა შავგულიძე; ისანში - გიორგი ვაშაძე; ნაძალადევში - შალვა ნათელაშვილი.

„ნაციონალური მოძრაობის“ ერთ-ერთი ლიდერი, ლევან ბეჟაშვილი გუშინ აცხადებდა, რომ თბილისის ორ ოლქში პარტია მაჟორიტარებად ნიკა მელიასა და ზაალ უდუმაშვილის კანდიდატურებს განიხილავდა, თუმცა საბოლოო გადაწყვეტილება ჯერ არ იყო მიღებული.

მმართველ გუნდში ოპონენტებს კონკურენტებად არ აღიქვამენ, ვინაიდან ფიქრობენ, რომ ისინი მარგინალური ჯგუფები არიან და პოლიტიკური მომავალი იმ ფორმით, როგორც წარმოუდგენიათ, არ გააჩნიათ.

„ლელო“ კანდიდატების დასახელებას დამოუკიდებლად გეგმავს.