გიორგი ვოლსკი: თუ საერთაშორისო თანამეგობრობა რაღაც დოზით ჩარეულია სიტუაციის დალაგებაში, ერთხელ და სამუდამოდ, ლანძღვა-გინების გადალახვაში, ამაში ცუდი არაფერია

„დღეს წარმოდგენილი ცვლილებებისადმი მხარდაჭერა იმის ქვაკუთხედია, რომელზეც მომავალი პოლიტიკური საზოგადოება უნდა აშენდეს“, - ამის შესახებ პარლამენტის ვიცე-სპიკერმა გიორგი ვოლსკიმ პარლამენტის რიგგარეშე სხდომაზე განაცხადა, რომელზეც საკონსტიტუციო ცვლილებებს კენჭს პირველი მოსმენით უყრიან.

„სხვადასხვა შეხედულება გვაქვს, თუმცა არის მთავარი თემა, რომელიც წესით უნდა გვაერთიანებდეს. რაც არ უნდა დაპირისპირებული ვიყოთ, მაინც არის ერთი გამაერთიანებელი - ჩვენი სამშობლო. არავინ დაიჯეროს, რომ საქართველო გარე ფაქტორების გარეშე შეიძლება იყოს წარმატებული. მნიშვნელოვანი გავლენა აქვს საერთაშორისო თანამეგობრობას.

უპრეცდენტოა ის მდგომარეობა, რომელიც გვაქვს თუნდაც ევროკავშირთან და აშშ-სთან ურთიერთობაში. თუ საერთაშორისო თანამეგობრობა რაღაც დოზით ჩარეულია სიტუაციის დალაგებაში, ერთხელ და სამუდამოდ, ლანძღვა-გინების გადალახვაში, ამაში ცუდი არაფერია. თუმცა არავინ თქვას, რომ ხალხის გარეშე რაიმე გადაწყვეტილების მიღება შეიძლება“, - აღნიშნა გიორგი ვოლსკიმ.

ვიცე-სპიკერმა დღევანდელ დღეს ისტორიული უწოდა.

„გავა დრო, არავინ ვიქნებით - ღმერთმა დიდხანს გვაცოცხლოს, მაგრამ მინიმუმ 60 წელიწადში არავინ ვიქნებით აქ და რაღაც რესურსი, პოლიტიკის რაღაც კულტურა დარჩება ქვეყანას, რომელიც ამ გადაწყვეტილებით უნდა იყოს გამაგრებული. ეს არის რეალობა და ამას თვალი უნდა გავუსწოროთ. წინააღმდეგ შემთხვევაში, არც 2024 წელს ექნება სიმშვიდე საქართველოს. გავა ჩვენი დრო, მოვა ახალი თაობა, რომლებიც ერთმანეთს მწარედ დაუპირისპირდებიან, მაგრამ არ ექნებათ პიროვნული აუტანლობა, რომელიც გამოვამჟღავნეთ, თუმცა მივაღწიეთ კონსენსუსურ გადაწყვეტილებას“, - განაცხადა გიორგი ვოლსკიმ.

მისივე თქმით, სტაბილურობა არის მთავარი ლოზუნგი, რომლითაც „ქართული ოცნება“ არსებობს და ამის გარეშე განვითარებას ადგილი არ ექნება.

მანვე უპასუხა ინიციატივას არჩევნებში სავალდებულო მონაწილეობის შესახებ, რომლითაც დღეს ემზარ კვიციანი გამოვიდა. გიორგი ვოლსკიმ აღნიშნა, რომ ამის ადმინისტრირება რთულია.

კანონპროექტის მიხედვით, 2020 წლის საპარლამენტო არჩევნები შერეული სისტემით ჩატარდება, რაც იმას ნიშნავს, რომ პარლამენტში აირჩევენ 120 წევრს პროპორციული და 30 წევრს მაჟორიტარული საარჩევნო სისტემით.

„ნაციონალური მოძრაობა“ საკონსტიტუციო ცვლილებების განხილვაში არ მონაწილეობს.

სხდომაზე არიან „ევროპული საქართველოს“ წევრები. პარტიის ლიდერების თქმით, პროექტის მეორე და მესამე მოსმენით განხილვაში მათი მონაწილეობა იმაზე იქნება დამოკიდებული, გათავისუფლდება თუ არა გიორგი რურუა.

ოპოზიცია და ხელისუფლება 8 მარტს 2020 წლის არჩევნების 120/30-ზე მოდელით ჩატარებაზე შეთანხმდნენ. შესაბამის შეთანხმებას მხარეებმა აშშ-ის ელჩის რეზიდენციაში გამართულ შეხვედრაზე მიაღწიეს.

რა დოკუმენტებს მოაწერეს ხელი აშშ-ის საელჩოში გამართული შეხვედრის მონაწილეებმა, წაიკითხეთ ამ ბმულზე.