აფგან მუხტარლის ცოლს საქართველოს მოქალაქეობის მიღება არ უნდა

აზერბაიჯანელი ჟურნალისტის, აფგან მუხტარლის მეუღლე ლეილა მუსტაფაევა ძველი თბილისის პოლიციაში დაკითხვის შემდეგ შს მინისტრთან შესახვედრად ადვოკატთან ერთად წავიდა.

დაკითხვიდან გამოსულმა მუსტაფაევამ ჟურნალისტებთან განაცხადა, რომ ის საქართველოს მოქალაქეობის მიღებაზე უარს ამბობს. ინფორმაციას 1tv ავრცელებს.

პრემიერმინისტრის გიორგი კვირიკაშვილის ინიციატივაზე, რომ გამონაკლისის სახით მუხტარლის მეუღლეს და შვილებს საქართველოს მოქალაქეობა მიენიჭოთ, ლეილა მუსტაფაევა ამბობს, რომ მას არ სურს აზერბაიჯანის მოქალაქეობაზე უარის თქმა, რაც საქართველოს მოქალაქეობის მინიჭებით მოხდება. 

„მე უარს ვამბობ საქართველოს მოქალაქეობის მიღებაზე. ეს ნიშნავს რომ მე უარი უნდა ვთქვა აზერბაიჯანის მოქალაქეობაზე, რაც არ მსურს. თუ მსურდა საქართველოს მოქალაქეობა, მე ამას ადრე გავაკეთებდი. გასულ წელს მე ბინადრობის უფლების მიღებაზე მივმართე ქართულ მხარეს, რაზეც მითხრეს, რომ თქვენ სახიფათო საქმეებით ხართ დაკავებული და ეს საქართველოს ინტერესებში არ შედისო. ახლა აღარ ვარ სახიფათო, რაც ჩემი ქმარი დაიჭირეს? არაა საჭირო შოუების მოწყობა, ჯობია სამართალდამცველებს მიმართონ რომ გამოიძიონ საქმე ისე როგორც საჭიროა“ - განაცხადა ლეილა მუსტაფაევამ. 

ეს განცხადება მან პოლიციაში გამოკითხვის დასრულების შემდეგ გააკეთა. ის აცხადებს, რომ გამომძიებლებს მოუყვა, რაც მისი მეუღლისგან იცის მუხტარლის თბილისში აყვანასთან და მისი აზერბაიჯანული მხარისთვის გადაცემასთან დაკავშირებით. მუხტარლის მეუღლე აცხადებს, რომ მუხტარლი ოთხმა პირმა დააკავა, მათგან სამი კი კრიმინალური პოლიციის ფორმაში იყო ჩაცმული.

პრემიერმინისტრის, გიორგი კვირიკაშვილის ინიციატივასთან დაკავშირებით, მუხტარლის ოჯახის წევრებისათვის საქართველოს მოქალაქეობის მინიჭებასთან დაკავშირებით, პრეზიდენტის ადმინისტრაციაში განაცხადეს, რომ გიორგი მარგველაშვილი ამისთვის მზადაა.

მუხტარლის გატაცების საქმეს დღეს აშშ-ს სახელმწიფო დეპარტამენტიც გამოეხმაურა და ოფიციალურ ბაქოს მისი გათავისუფლებისკენ მოუწოდა. 

აზერბაიჯანელი აქტივისტი და ჟურნალისტი აფგან მუხტარლი ბოლო 2 წელია ოჯახთან ერთად საქართველოში ცხოვრობდა. საქმიანობიდან გამომდინარე, მისი აზერბაიჯანში დარჩენა საფრთხეს წარმოადგენდა. 

მუხტარლის ოჯახის წევრების თქმით, ის თბილისიდან 29 მაისს გაუჩინარდა, სახლიდან გავიდა და არ დაბრუნებულა. მოგვიანებით, ცნობილი გახდა, რომ ის ბაქოში გადაიყვანეს. ბაქოს საქალაქო სასამართლომ მას სამთვიანი წინასწარი პატიმრობა შეუფარდა. ჟურნალისტს აზერბაიჯანის პროკურატურამ ბრალი კონტრაბანდის, სახელმწიფო საზღვრის უკანონო გადაკვეთისა და პოლიციისთვის დაუმორჩილებლობის მუხლებით წარუდგინა.

აფგან მუხტარლის საქმესთან დაკავშირებით, საქართველოს შსს-მ გამოძიება დაიწყო საქართველოს სსკ-ს 143-ე მუხლით, რაც თავისუფლების უკანონო აღკვეთას გულისხმობს. სახელმწიფო უსაფრთხოების სამსახურის ხელმძღვანელის ვახტანგ გომელაურის განცხადებით, აზერბაიჯანელი ჟურნალისტი „მწვანე საზღვარზე“ დააკავეს და არა გამშვებ პუნქტზე.

თუმცა, მუხტარლის ახლობლებს, ჟურნალისტების და არასამთავრობო სექტორის ნაწილს არ სჯერა, რომ მისი საქართველოში გაუჩინარება და აზერბაიჯანში გადაყვანა ქართული სპეცსამსახურების დახმარების თუ მათი უმოქმედობის გარეშე მოხდა.