ცოტნე ზურაბიანი: მიმდინარე პროცესს რადიკალური ოპოზიცია გაემიჯნა, რაც ნიშნავს, რომ ისინი 8 მარტის პოლიტიკური შეთანხმებიდან გავიდნენ

დღეს ყველამ დავინახეთ, რომ მიმდინარე პროცესს რადიკალური ოპოზიცია გაემიჯნა, რაც ნიშნავს, რომ ისინი 8 მარტის პოლიტიკური შეთანხმებიდან გავიდნენ, - ამის შესახებ უმრავლესობის წევრმა, ცოტნე ზურაბიანმა „postv“-ის ეთერში განაცხადა.

მისი თქმით „ნაციონალურ მოძრაობას“ და „ევროპულ საქართველოს“ არასდროს სურდათ, რომ შეთანხმება შემდგარიყო.

„ჩვენ ვიხილეთ უპასუხისმგებლო „ნაციონალური მოძრაობა“ და „ევროპული საქართველო“, რომელებიც რამდენიმე დღის წინ ამბობდნენ, რომ „რომ არა ჩვენ, საკონსტიტუციო ცვლილებები პირველი მოსმენით ჩავარდებოდაო“. ასეთი არაადეკვატური განცხადებების მომსწრე ვართ ოპოზიციის მხრიდან, ისინი არიან ადამიანები, რომლებიც ყველაზე მთავარს, ქვეყნის ხვალინდელ დღეს არ უჭერენ მხარს და არ აძლევენ ხმას იმ კანონს, რომელიც პოლიტიკური პროცესების ნორმალური განვითარების გარანტია. ერთადერთი, რა დასკვნაც ჩვენ შეგვიძლია გამოვიტანოთ - მათ არასოდეს არ სურდათ მომხდარიყო შეთანხმება და რაიმე საერთო კონსესუსისთვის მიგვეღწია“, - აღნიშნა ცოტნე ზურაბიანმა.

პარლამენტის პლენარულ სხდომაზე საკონსტიტუციო ცვლილებებს კენჭი მეორე მოსმენით უყარეს. კანონპროექტს მხარი დაუჭირა 115-მა დეპუტატმა, 3-მა კი წინააღმდეგ მისცა ხმა. რეგისტრაცია გაიარა 119-მა დეპუტატმა.

ოპოზიცია და ხელისუფლება 8 მარტს 2020 წლის არჩევნების 120/30-ზე მოდელით ჩატარებაზე შეთანხმდნენ. შესაბამის შეთანხმებას მხარეებმა აშშ-ის ელჩის რეზიდენციაში გამართულ შეხვედრაზე მიაღწიეს.

რა დოკუმენტებს მოაწერეს ხელი აშშ-ის საელჩოში გამართული შეხვედრის მონაწილეებმა, წაიკითხეთ ამ ბმულზე.