ლევან კობერიძე ჯანდაცვის შესახებ კანონში ცვლილებებზე: კლინიკებისა და სამედიცინო სექტორის წარმომადგენლებს ნაკლებად მიეცათ შესაძლებლობა, მსჯელობაში ჩართულიყვნენ

კლინიკებისა და სამედიცინო სექტორის წარმომადგენლებს, ნაკლებად მიეცათ შესაძლებლობა, ჩართული ყოფილიყვნენ მსჯელობაში, - ამის შესახებ დამოუკიდებელმა დეპუტატმა, ლევან კობერიძემ ჯანდაცვის კომიტეტის სხდომაზე განაცხადა.

მისი განცხადებით, მიუხედავად სახელისუფლებო გუნდის წევრებისგან, პრემიერ-მინისტრისა და მინისტრთა კაბინეტის წევრების მხრიდან არაერთი დაპირებისა, სამედიცინო სექტორის წარმომადგენლებს, არც მსჯელობაში ჩართვისა და არც მათი მხრიდან აზრის დაფიქსირების საშუალება არ მიეცათ. ლევან კობერიძის ინფორმაციით, ჯანდაცვის სექტორი მზად არის ნებისმიერი სახის შეხვედრისათვის - იქნება ეს ღია თუ დახურული შეხვედრა.

დღევანდელ სხდომაზე ლევან კობერიძემ კომიტეტის წევრებსაც მიმართა.

„მოგმართავთ, ეს კანონპროექტი წინასწარი კონსულტაციების გარეშე არ იყოს განხილული, რადგან, მიუხედავად ყველას მხრიდან დაპირებებისა, სექტორის წარმომადგენლებთან, პრაქტიკულად, კონსულტაციები არ გამართულა და ჯანდაცვის კომიტეტიც მივიდა უკვე იმ ეტაპამდე, რომ დარგთან აღარ უნდა შეხვედრა და დალაპარაკება?!“, - განაცხადა ლევან კობერიძემ.

შეგახსენებთ, რომ ხვალ, საქართველოს პარლამენტის ჯანმრთელობის დაცვისა და სოციალურ საკითხთა კომიტეტი პირველი მოსმენით განიხილავს საქართველოს მთავრობის მიერ საკანონმდებლო ინიციატივის წესით წარმოდგენილი საქართველოს კანონების პროექტებს: „ჯანმრთელობის დაცვის შესახებ“ საქართველოს კანონში ცვლილების შეტანის თაობაზე“, „ლიცენზიებისა და ნებართვების შესახებ“ საქართველოს კანონში ცვლილების შეტანის თაობაზე“, „საქართველოს ადმინისტრაციულ სამართალდარღვევათა კოდექსში ცვლილების შეტანის შესახებ“ და „სამეწარმეო საქმიანობის კონტროლის შესახებ“ საქართველოს კანონში ცვლილების შეტანის თაობაზე“.