ვიქტორ ყიფიანი: ჩვენი ზოგიერთი პოლიტიკოსის უმწიფრობა, დიპლომატიური წარმომადგენლობების განცხადებებში დელიკატურად შეფასდა

ელჩების განცხადება და დიპლომატიური წარმომადგენლობების განცხადება არის ძალიან დელიკატური შეფასება ჩვენი პოლიტიკური თემის ზოგიერთი წარმომადგენლის პოლიტიკური უმწიფრობის, - ამის შესახებ დამოუკიდებელმა ანალიტიკოსმა, „ჯეოქეისის“ თავმჯდომარემ, ვიქტორ ყიფიანმა „დღის ქრონიკაში“ შუამავალი ელჩების ერთობლივ განცხადებაზე საუბრისას განაცხადა.

„ოპოზიციის ნაწილის მხრიდან მოხდა ძალიან მნიშვნელოვანი ტესტის ჩავარდნა: პირველი საკუთარი ამომრჩევლის მიმართ, ანუ მათი ამომრჩეველი ასეთი მიდგომით და გადაწყვეტილებით დაიბნა, მეორე - დაიბნა დასავლეთი, ვინაიდან ეს იმ თემის ნაწილია, რომელიც ერთგვარ ექსკლუზიურობას განაცხადებს და აცხადებს დასავლეთთან ურთიერთობაზე. ამ კენჭისყრამდე არაერთი განცხადება და მოწოდება იყო, რომელიც მოუწოდებდა სხვადასხვა პოლიტიკურ პარტიას, რომ ეს პროცესი ყოფილიყო მაქსიმალურად ინკლუზიური, პოლიტიკური პარტიების მაქსიმალურად ჩართულობა მომხდარიყო, მაგრამ აქაც აცდენა მოხდა.

მათ სწორად ვერ წაიკითხეს ვითარება, მათ არ ეყოთ ალღო ქვეყნის შიგნით და ქვეყნის გარეთ შექმნილი ვითარების წაკითხვისა, რომელიც მარტივად რომ ვთქვათ გამოიხატება შემდეგში: ჩვენი დასავლელი პარტნიორები და მოკავშირეები მომხრენი არიან, რომ პროცესებმა ქუჩიდან გადაინაცვლოს ინსტიტუტებში, ალბათ ეს განცხადებები და ეს პროცესი სწორედ აქეთკენ იყო მიმართული, რომ ქართული პოლიტიკის ქმნა გამხდარიყო უფრო ცივილური, ინსტიტუტებზე დაფუძნებული“, - აღნიშნა ვიქტორ ყიფიანმა.

მისი თქმით, დღეს ქვეყანამ გადადგა ერთი ნაბიჯი სტაბილური პოლიტიკური სისტემისკენ, მაგრამ სამწუხაროდ ამაში ყველა აქტორს მონაწილეობა არ მიუღია.

„ერთი მხრივ მივიღეთ, ის რომ ქვეყანამ გადადგა ერთი ნაბიჯი წინ სტაბილური პოლიტიკური სისტემისკენ, მაგრამ სამწუხაროა ის, რომ ამ ნაბიჯის გადადგმაში ყველა აქტორს მონაწილეობა არ მიუღია. ეს არის ყველაზე გულდასაწყვეტი გაკვეთილი, რომ ჩვენ პოლიტიკური სიმწიფის მოსაპოვებლად კიდევ დიდი გზა გვაქვს გასავლელი და ამ შემთხვევაში მოვუწოდებდი მათ, (ოპოზიციის ნაწილს) რომ მინიმუმ საარჩევნო პროცესისადმი მზადება და საარჩევნო პროცესში მონაწილეობა იყოს მაქსიმალური პასუხისმგებლობით გამსჭვალული. მათ, ისევე როგორც მთლიან პოლიტიკურ სპექტრს, რჩებათ ეს ბოლო შანსი - გამოვაჩინოთ ქართული დემოკრატიის სიმწიფე და განვითარების დონე“, - აღნიშნა ანალიტიკოსმა.

ელჩები ყველა მხარეს მოუწოდებენ, ჩაერთონ ეუთო/ოდირის საარჩევნო რეფორმების რეკომენდაციების მიღებასა და შესრულებაში.

პარლამენტმა საკონსტიტუციო ცვლილებებს კენჭი მესამე მოსმენით დაამტკიცა. კანონპროექტს მხარი დაუჭირა 117-მა დეპუტატმა, 3-მა კი წინააღმდეგ მისცა ხმა. რეგისტრაცია გაიარა 120-მა დეპუტატმა. კენჭისყრაში „ნაციონალური მოძრაობა“ და ევროპული საქართველო“ არ მონაწილეობდა.