რომან გოცირიძე: დიახ, ჩვენ რადიკალური ოპოზიცია ვართ

ფრაქცია „ნაციონალური მოძრაობის“ თავმჯდომარე რომან გოცირიძე აღიარებს, რომ „ნაციონალური მოძრაობა“ რადიკალური ოპოზიციაა. ამის შესახებ მან იურიდიულ საკითხთა კომიტეტის სხდომაზე განაცხადა, სადაც საარჩევნო კოდექსის პროექტის განხილვა მიმდინარეობს.

„მინდა შეგახსენოთ, რომ რადიკალურ ოპოზიციად ეროვნულ მოძრაობას კომუნისტური პარტია უწოდებდა. მაშინ უნდა წარმოადგინოთ რადიკალური და ჯიბის ოპოზიციის რეესტრი, რათა ყველამ იცოდეს. იქნებ ის, ვისაც თქვენ თვლით რბილ ოპოზიციად, ის თავს ყველაზე რადიკალურად მიიჩნევს. ასეთი ენით საუბრით იდენტიფიცირებას იკეთებთ კომუნისტურ პარტიასთან. დიახ, ვართ რადიკალური ოპოზიცია“, - განაცხადა გოცირიძემ.

გოცირიძეს გამოეხმაურა კომიტეტის თავმჯდომარე ანრი ოხანაშვილი. მისი განცხადებით, მართალია, რომ აღიარება ამსუბუქებს პასუხისმგებლობას, მაგრამ სასჯელისგან სრულად გათავისუფლებას არ ითვალისწინებს.

„მგონია, რომ ბატონი რომანი იმასაც იტყვის, რომ ამ ცვლილებებსაც არ უჭერს მხარს. საზოგადოების დაცინვის, ცინიკური გამონათქვამებისა და საზოგადოების აბუჩად აგდების უფლებას ვერ მოგცემთ. აღიარება კი არის პასუხისმგებლობის შემამსუბუქებელი გარემოება, მაგრამ პასუხისმგებლობისგამ სრულ გათავისუფლებას არ ითვალისწინებს. ამბობთ, რომ რადიკალური ჯგუფი ხართ. ხვალ შეიძლება თქვათ, რომ დანაშაულებრივი ჯგუფიც ხართ. მახსოვს, რომ თქვენმა პარტიამ კენჭისყრაზეც არ შემოგიშვათ. იქნება გაარკვიოთ, რატომ არ მოგეცათ ასეთი შესაძლებლობა“, - განაცხადა ოხანაშვილმა.

იურიდიულ საკითხთა კომიტეტის სხდომაზე საარჩევნო კოდექსის პროექტის განხილვა დაიწყო. დეპუტატებს ცვლილებებს ირაკლი კობახიძე წარუდგენს. სამუშაო ჯგუფმა ეუთოს 27-პუნქტიან რეკომენდაციაზე იმუშავა.

სხდომას საპარლამენტო და არასაპარლამენტო ოპოზიციისა და არასამთავრობო ორგანიზაციების წარმომადგენლები ესწრებიან.

პარლამენტი მიმდინარე კვირაში, საარჩევნო კანონმდებლობაში შესატანი ცვლილებების განხილვას დაჩქარებული წესით იწყებს. რა ცვლილებებს ითვალისწინებს საარჩევნო კოდექსის პროექტი, წაიკითხეთ ბმულზე.