ლადო ბოჟაძე: „ნაციონალურ მოძრაობას“ და ევროპულ „ნაციონალურ მოძრაობას“ აზრზე მოსვლა უნდა ვაცადოთ

ძალიან მნიშვნელოვანია, რომ ახლა ჩვენ გვექნება რეალურად განსხვავებული საარჩევნო გარემო, რაც დიდწილად საარჩევნო სისტემის ცვლილების დამსახურება იქნება. ამის შესახებ „დღის ქრონიკის“ ეთერში ანალიტიკოსმა ლადო ბოჟაძემ განაცხადა. მისი თქმით, კანონმდებლობაში პრაქტიკულად ყველა რეკომენდაცია იქნება გათვალისწინებული, რაც საქართველომ ეუთოსგან 2018 წლის საპრეზიდენტო არჩევნების შემდეგ მიიღო, მაგრამ რეფორმების პროცესი უნდა გაგრძელდეს.

ანალიტიკოსი ასევე რადიკალური ოპოზიციის მიდგომაზე ამახვილებს ყურადღებას და აღნიშნავს, რომ „ნაციონალურ მოძრაობას“ და „ევროპულ საქართველოს“ ცვლილებების მიღება არ უნდოდათ.

„მე ვფიქრობთ, რომ ჩვენ, განსაკუთრებით რადიკალურ ოპოზიციას - „ნაციონალურ მოძრაობას“ და ევროპულ „ნაციონალურ მოძრაობას“ ცოტა ხანი უნდა ვაცადოთ აზრზე მოსვლა, იმიტომ რომ ისინი არ ელოდნენ, რომ მესამე მოსმენით იქნებოდა მიღებული საბოლოო გადაწყვეტილება. ისინი ბოლომდე აკეთებდნენ ყველაფერს, რომ საერთოდ არ მიეღოთ საკონსტიტუციო ცვლილებები“, - აღნიშნა ბოჟაძემ.

მისი თქმით, დიდია იმის ალბათობა, რომ ამ პარტიებისთვის არჩევნების შედეგი შესაძლოა მიუღებელი იყოს, თუმცა კანონმდებლობაში შეტანილი ცვლილებები პრაქტიკულად ყველა პრობლემას აგვარებს.

„ყველა პრობლემა, რომელსაც მუდმივად აყენებდა ოპოზიცია - ამას დიდი მასშტაბი ჰქონდა, პატარა მასშტაბი ჰქონდა, ახდენდა თუ არა არჩევნებზე გავლენას, ეს კიდევ ცალკე თემა არის, მაგრამ რეალურად, ფაქტობრივად კითხვის ნიშანი არ არის დარჩენილი არც ერთ საკითხთან მიმართ, რომელიც არ აუმჯობესებს ზოგადად საარჩევნო გარემოს“, - ამბობს ბოჟაძე.

პარლამენტმა საკონსტიტუციო ცვლილებებს კენჭი მესამე მოსმენით დაამტკიცა. კანონპროექტს მხარი დაუჭირა 117-მა დეპუტატმა, 3-მა კი წინააღმდეგ მისცა ხმა. რეგისტრაცია გაიარა 120-მა დეპუტატმა. კენჭისყრაში „ნაციონალური მოძრაობა“ და ევროპული საქართველო“ არ მონაწილეობდა.