არჩილ თალაკვაძე: პარლამენტში და მის გარეთ გაჩნდა ახალი ოპოზიცია, ხოლო ძველი ყოველდღე კარგავს ადგილს მომავლის პოლიტიკაში

„ევროპული საქართველო“ ვერ გამოდის „ნაციონალური მოძრაობის“ რადიკალიზმის კომპლექსიდან. მას თითქოს უნდა მომავლის პოლიტიკაში ყოფნა, მაგრამ მთელი თავისი გადაწყვეტილებებით ჩარჩენილია წარსულის პოლიტიკაში. დღეს უკვე პარლამენტში და მის გარეთაც გაჩნდა ახალი ოპოზიცია, ხოლო ეს ძველი ოპოზიცია ყოველდღე კარგავს ადგილს მომავლის პოლიტიკაში, - ამის შესახებ ტელეკომპანია „იმედის“ გადაცემაში „არენა“ პარლამენტის თავმჯდომარემ, არჩილ თალაკვაძემ განაცხადა.

„ისინი მაჟორიტარული მოდელით აყალბებდნენ წარსულში არჩევნებს, დღესაც კი მხარი არ დაუჭირეს პროპორციულ სისტემაზე გადასვლას, ვინაიდან ეს სისტემაა ჩარჩენილ მათ ფიქრებსა და გეგმებში. რატომ გააკეთა ეს „ევროპულმა საქართველომ“, ესაა ძალიან მნიშვნელოვანი. „ევროპული საქართველო“ ხედავს, რომ მას პირდაპირი სახალხო მხარდაჭერა აქვს ძალიან დაბალი. რითი დაიწყეს კონსულტაციები ოპოზიციურმა პარტიებმა? მათ თქვეს, რომ შეიკრიბებიან და შეთანხმდებიან მაჟორიტარულ კანდიდატებზე. ერთი კვირის შემდეგ უკვე თქვეს, რომ არა ერთ საერთო კანდიდატზე შეთანხმდებიან, არამედ ორ-ორს დააყენებენ. დღეს უკვე ამბობენ, რომ ბევრს დააყენებენ, მაგრამ მთავარი ისაა, რომ ვინც თავიდან ამბობდა, რომ დადგება მაჟორიტარად და დაამარცხებს „ქართულ ოცნებას“, ის პოლიტიკოსებიც კი პრაქტიკულად ერთმანეთს აჩეჩებენ მაჟორიტარობას და აცხადებენ, რომ ოლქებს სხვა პარტიას უთმობენ. შემდეგ ის პარტია გამოდის და ამბობს, რომ უთმობს ოლქებს მესამე პარტიას და ა.შ. აქედან ჩანს ის, რომ ამ ხალხს პოლიტიკური და ადამიანური რესურსი, ავტორიტეტისა და ნდობის მქონე კანდიდატები თითზე ჩამოსათვლელი ჰყავთ ან საერთოდ არ ჰყავთ. „ევროპული საქართველო“ და „ნაციონალური მოძრაობა“ ეჯიბრებიან ერთმანეთს, ვინ უფრო რადიკალური იქნება და ვინ უფრო მეტად შეძლებს ქვეყნის დესტაბილიზაციას. ამის მაგალითები იყო ერთი წლის წინ, ორი წლის წინ და ახლაც. „ნაციონალურმა მოძრაობამ“ პირდაპირ თქვა, რომ მხარს არ დაუჭერს ცვლილებებს და ყველა მეთოდით იბრძოლებს, გარდა დემოკრატიული არჩევნებისა. როგორც კი „ევროპულმა საქართველომ“ დაინახა, რომ კარგავს დესტრუქციულ, რადიკალიზებულ ნიშას, მაშინვე უარი განაცხადეს კენჭისყრაში მონაწილეობაზე. ჩვენ ვხედავთ შეჯიბრს, როდესაც „ევროპული საქართველო“ ვერ გამოდის „ნაციონალური მოძრაობის“ რადიკალიზმის კომპლექსიდან. მას თითქოს უნდა მომავლის პოლიტიკაში ყოფნა, მაგრამ მთელი თავისი გადაწყვეტილებებით ჩარჩენილია წარსულის პოლიტიკაში. დღეს უკვე პარლამენტში და მის გარეთაც გაჩნდა ახალი ოპოზიცია, ხოლო ეს ძველი ოპოზიცია ყოველდღე კარგავს ადგილს მომავლის პოლიტიკაში“, - განაცხადა თალაკვაძემ.