რომან გოცირიძე საზოგადოებრივი ჯანმრთელობის შესახებ კანონპროექტზე: ეს კანონი არის ანტიკონსტიტუციური

გამოდის რომ, წინასაარჩევნოდ ხელისუფლება პანდემიის საკითხით მანიპულირებს და ხელში იგდებს ისეთ ბერკეტებს, რომლებიც შეიძლება გამოყენებული იქნას არჩევნების პროცესში უხეშად ჩასარევად. ფაქტობრივად, დიქტატურის დამყარება შეუძლიათ ამ კანონით, - ამის შესახებ „ნაციონალური მოძრაობის“ წევრმა, რომან გოცირიძემ ჟურნალისტებს საზოგადოებრივი ჯანმრთელობის შესახებ კანონპროექტზე განუცხადა.

მისი თქმით, ეს ეს კანონი არის ანტიკონსტიტუციური და მთავრობას ეძლევა ისეთი უფლებები, რაც მას მხოლოდ საგანგებო მდგომარეობის პერიოდში შეიძლება ჰქონდეს.

„ეს კანონი არის ანტიკონსტიტუციური და მთავრობას ეძლევა ისეთი უფლებები, რაც მას მხოლოდ საგანგებო მდგომარეობის პერიოდში შეიძლება ჰქონდეს. ეს უზარმაზარი ბერკეტებით აღჭურვაა მთავრობისა და პარტიის, ფაქტობრვად, წინასაარჩევნო პერიოდში, როდესაც მას შეუძლია გააკეთოს ყველაფერი, რაც ამ პანდემიის პირობებში ვნახეთ, დაწყებული კარანტინებითა და კომენდატის საათით და ქალაქების ჩაკეტვით ა. შ. ნებისმიერი გადაწყვეტილება შეუძლიათ მიიღონ და მას შეუძლია საარჩევნო კამპანიაზე მოახდინოს გავლენა, ნებისმიერი ქალაქი, რომელიც არ მოეწონება დაკეტოს პანდემიის მომიზეზებით. ცუდი სიგნალი არის ის, რომ თურმე, მთელი ხუთი თვის განმავლობაში არ აპირებენ ეკონომიკის გახსნას და ეკონომიკის გამოცოცხლებას“, - განაცხადა რომან გოცირიძემ.

მისი თქმით, ხელისუფლებამ კანონი რომ არ გამოიყენა ერთი თვის განმავლობაში, არ ნიშნავს, რომ ხვალ არ გამოყენებს.

„როდესაც ადამიანს პისტალეტი გაქვს, შეიძლება არ გამოიყენო ერთი წელი, 10 წელიწადი, მაგრამ როდესაც დაგჭირდება, შეილება, გამოიყენო. ამ ერთი თვის განმავლობაში არ სჭირდებოდათ მისი გამოყენება, არ არის საარჩევნო კამპანია დაწყებული. ხელისუფლებას ეს დაჭირდება პირდაპირ არჩევნების წინა დღეებში და შეუძლია გამოიყენოს არჩევნების დღესაც. რომ არ გამოიყენა ერთი თვის განმავლობაში, იმას არ ნიშნავს, რომ არ გამოყენებს ხვალ“, - განაცხადა რომან გოცირიძემ.

საგანგებო მდგომარეობის გარეშე​ გარკვეული შეზღუდვების დაწესების უფლება მთავრობას შესაძლოა, 2020 წლის ბოლომდე გაუხანგრძლივდეს.

შესაბამისი საკანონმდებლო ცვლილება საპარლამენტო უმრავლესობის წევრებმა დიმიტრი ხუნდაძემ, დიმიტრი მხეიძე, ზურაბ ხაჩიძემ და ილია ნაკაშიძემ მოამზადეს.

დადგენილება, რომელიც საქართველოს მთავრობამ ქვეყანაში გარკვეული შეზღუდვების ძალაში დატოვების შესახებ გამოსცა, ძალაშია 2020 წლის 15 ივლისამდე.