გიორგი ვოლსკი დავით კეზერაშვილზე: ტერიტორიების მნიშვნელოვანი ნაწილის ოკუპაცია მოხდა, ადამიანები ბრძოლის ველზე მიატოვეს - გვითხრას, ამის შემდეგ არის გამდიდრებული, თუ მანამდე

„საქართველოს მიაყენეს სისხლიანი ჭრილობები, ხალხი დაიხოცა, ადამიანები ბრძოლის ველზე მიატოვეს - მას შემდეგ არის გამდიდრებული, თუ - იმის წინ იყო, ესეც გვითხრას“, - ამის შესახებ ვიცე-სპიკერი გიორგი ვოლსკი თავდაცვის ყოფილ მინისტრ დავით კეზერაშვილთან დაკავშირებით კომენტირებისას აცხადებს.

„ახლახან მოვისმინეთ თავდაცვის მინისტრის მოხსენება პარლამენტის წინაშე, სადაც საუბრობს ათეულობით მილიონობით დოლარის ნაძარცვზე, რომელიც საქართველოს ჯარს მიადგა, მაგრამ ეს თემა, რაზეც გამოძიება მიმდინარეობს, ეხება სწორედ იმ პერიოდს, როდესაც მოხდა მზაკვრული თავდასხმა საქართველოზე და მისი ტერიტორიების ოკუპაცია.

ამ პერიოდზეა ლაპარაკი და მეორე, ყველაფერს რომ თავი დავანებოთ, ლაპარაკია იმაზე, რომ საქართველოში, მას შემდეგ რაც საქართველოს ტერიტორიების მნიშვნელოვანი ნაწილის ოკუპაცია მოხდა, თავდაცვის მინისტრი გვევლინება, როგორც მსოფლიოში ერთ-ერთი შეძლებული ადამიანი, რომელიც აფუძნებს ტელევიზიას და ეძებს ბიძინა ივანიშვილის ქონების წარმომავლობას, ეს არის ფაქტი და ამ ფაქტთან დაკავშირებით ჩემი შეფასება ზედმეტია იმიტომ, რომ საზოგადოება ხედავს, რა ხდება.

ჩვენ, მიმდინარე გამოძიების შედეგებს წინასწარ ვერ გავთვლით, სასამართლო მიმდინარეობს, ისრაელი დემოკრატიული სახელმწიფოა, რა შედეგები იქნება, ეგ ერთია, მაგრამ ფაქტი რაც ვიცით, არის ის, რაც ეხება პირადად კეზერაშვილს, როგორც თავდაცვის მინისტრს. საქართველოს მიაყენეს სისხლიანი ჭრილობები, ხალხი დაიხოცა, ადამიანები ბრძოლის ველზე მიატოვეს - მას შემდეგ არის გამდიდრებული, თუ მანამდე იყო გამდიდრებული, ესეც გვითხრას“, - განაცხადა გიორგი ვოლსკიმ.

ისრაელის პროკურატურა გადამდგარი გენერლისთვის გალ ჰირშისთვის და მისი 3 ბიზნესპარტნიორისთვის, რომელთაგანაც ერთ-ერთი საქართველოს თავდაცვის ყოფილი მინისტრის, დავით კეზერაშვილის ნათესავია, ბრალის წარდგენას გეგმავს.

მათ, კომპანიაში - „დამცავი ფარი“ ედავებიან საქართველოსთან თავდაცვის სფეროში საქმიანობის შედეგად მიღებულ 11 მილიონზე მეტი ოდენობის შემოსავლებზე გადასახადებისთვის თავის არიდებას. სავარაუდოდ, დანაშაულს ადგილი ჰქონდა 2007-2009 წლებში“, - ნათქვამია სტატიაში.