თაკო ჩარკვიანი: თუ „ნაციონალურ მოძრაობაში“ გადაწყვეტენ, რომ „ძალა ერთობაშია“დაიშალოს და მათ ცალკე უნდათ გასვლა, ბუნებრივად წარმოიქმნება ბლოკები

„ნაციონალურმა მოძრაობამ“ დრო ითხოვა და ჩვენც ვთქვით - კი ბატონო, რადგან ახლა არ არის რაღაც ჯიბრის, ბზარის ხელოვნურად შეტანის დრო, - ამის შესახებ პარტია „კანონი და სამართლის“ ლიდერმა, თაკო ჩარკვიანმა განაცხადა.

„პირადად ჩემი პოზიცია ასეთია, ყველაფერს ვაკეთებთ იმისთვის, რომ „ძალა ერთობაშია“, რომელიც წარმატებული პროექტი იყო და ჯერჯერობით უფრო წარმატებული პროექტი ოპოზიციისთვის არ გამოჩენილა, ეს „ძალა ერთობაშია“ შენარჩუნდეს. რატომ იღებს ამ დროს „ნაციონალური მოძრაობა“? იმიტომ, რომ თავად პარტიაში კონსულტაციები მიმდინარეობს. ბევრი ემხრობა იმ აზრს, რაზეც ახლა მეც ვსაუბრობ, ბევრი ემხრობა, რომ არ დაიშალოს „ძალა ერთობაშია“.

ვფიქრობ, რომ ღირებულებების გამო ღირს, ერთმანეთს არ ვეჯინოთ და დაველოდოთ საბოლოო პასუხს. თუ იტყვიან საბოლოოდ, რომ გავდივართ ან კიდევ არ მოვლენ შემდეგ შეხვედრებზე, უკვე გამოჩნდება.
თუ გადასძალა „ნაციონალურ მოძრაობაში“ იმ აზრმა, რომ მაინცდამაინც დაიშალოს და მათ ცალკე უნდათ გასვლა, ბუნებრივად წარმოიქმნება ბლოკები“, - განაცხადა თაკო ჩარკვიანმა.

არსებობდა წერილობითი შეთანხმება, რომლის თანახმადაც, მომავალ საპარლამენტო არჩევნებში „ძალა ერთობაშია“ კოალიციის სახით უნდა გასულიყო, თუმცა „ნაციონალური მოძრაობი“ წევრებმა გუშინ მოსაფიქრებლად დრო ითხოვეს.

არსებული ინფორმაციით, „ძალა ერთობაშიას“ აქვს მემორანდუმი, რომელსაც ხელს 10 პოლიტიკური პარტიის პირველი პირი აწერს, სადაც მხარეები თანხმდებიან, რომ საპარლამენტო არჩევნებში, „ძალა ერთობაშია“ კოალიციური ფორმით უნდა წარდგეს, თუმცა, „ნაციონალურმა მოძრაობამ“ თანამოაზრეებს მოსაფიქრებლად დრო სთხოვა და არ მივიდა იმ შეხვედრაზე, რომელიც კოალიციის წევრებს შორის შედგა.

მოძრაობის „ძალა ერთობაშია“ საბურთალოს მაჟორიტარობის კანდიდატი პარტია „კანონი და სამართალის“ დამფუძნებელი თაკო ჩარკვიანი იქნება. მანამდე ოპოზიციამ საერთო მაჟორიტარი კანდიდატები დაასახელა. ელენე ხოშტარია ვაკეში იყრის კენჭს, ნიკა მელია - გლდანში, გიორგი ვაშაძე - ისანში, ლევან ხაბეიშვილი - სამგორში, შალვა შავგულიძე კი მთაწმინდაზე.