„ძალა ერთობაშიას“ განცხადებით, კვოტებზე საუბარი „ნაციონალურ მოძრაობასთან“ არ დაწყებულა

„ნაციონალური მოძრაობის“ ბრალდების პასუხად, მისი პოლიტიკური პარტნიორები ირწმუნებიან, რომ კვოტებზე საუბარი მიხეილ სააკაშვილის გუნდთან არც კი დაწყებულა, რადგან პარტია ერთობის წევრებთან თაიმაუტის რეჟიმში იმყოფება.

პაატა დავითაიას განცხადებით, ის მოძრაობის „ძალა ერთობაშია“ დაფუძნების დროს შეთანხმებული პრინციპების ერთგულია. ეს კი გულისხმობს, რომ ყველა პოლიტიკური სუბიექტი, რომელიც გაივლის რეგისტრაციას, ჩამოაყალიბებს საარჩევნო ბლოკს და იმოქმედებს ბლოკის პრინციპებიდან გამომდინარე, სადაც პირველი სამი ათეული დაკომპლექტებული უნდა იყოს თითო სუბიექტის წარმომადგენლით.

„ამ პრინციპებით ჩვენი საარჩევნო სუბიექტი ბლოკის სიის პირველ სამ ათეულში წარმოდგენილი უნდა იყოს თითო ადამიანით, დანარჩენი კონსულტაციების საგანია. ამ ეტაპზე არ მივსულვართ ამ საკითხის განხილვაზე. მოძრაობაში „ძალა ერთობაშია“ შემავალი ყველა სუბიექტი ერთგულია შეთანხმების, რომ არჩევნებზე გავალთ ერთად, მხოლოდ „ნაციონალურმა მოძრაობამ“ ითხოვა დრო შიდაპარტიული კონსულტაციებისთვის", - აცხადებს დავითაია.

„ქრონიკის“ ინფორმაციით, „ნაციონალურმა მოძრაობამ“ რეგიონების მასშტაბით მაჟორიტარების ნაწილი უკვე შეარჩია.