ოკუპანტების მიერ საქართველოს მოქალაქეების დაკავებების საკითხს ქართული მხარე ეუთოს მუდმივ საბჭოზე დააყენებს

ქართული მხარე საოკუპაციო ძალების მიერ საქართველოს მოქალაქეების დაკავებების საკითხს დღეს ეუთოს მუდმივ საბჭოზე დააყენებს. ამის შესახებ საგარეო საქმეთა მინისტრის მოადგილემ, ლაშა დარსალიამ განაცხადა.„ბოლო ინციდენტის შემდეგ დაუყოვნებლივ გაკეთდა შესაბამისი განცხადება, რასაც მოჰყვა პარტნიორების მხრიდან მტკიცე მხარდაჭერა. აშშ-მა და სხვა პარტნიორებმა გააკეთეს განცხადებები, რისთვისაც დიდ მადლობას ვუხდით მათ. ასევე დავით ზალკალიანის ბრიუსელში ვიზიტისას პარტნიორმა ქვეყნებმა გამოხატეს დიდი მხარდაჭერა. ჩვენ ვაგრძელებთ საერთაშორისო ფორუმებზე დაკავებების საკითხის განხილვას“, - აცხადებს დარსალია.

ოკუპანტებმა ზაზა გახელაძე 11 ივლისს დაჭრეს და დააკავეს. ოჯახის წევრების ინფორმაციით, ის ახალგორიდან ცხინვალში გადაიყვანეს. ფეხში დაჭრილი ზაზა გახელაძე ცხინვალის საავადმყოფოში, კარანტინშია მოთავსებული. საოკუპაციო ხაზთან მომხდარ ინციდენტთან დაკავშირებით ინფორმირებულია ევროკავშირის სადამკვირვებლო მისია. ამოქმედებულია ცხელი ხაზი.

რუსეთის საგარეო საქმეთა სამინისტრომ გაავრცელა განცხადება, რომელშიც მომხდარზე აშშ-ის რეაგირება გააკრიტიკა და 11 ივლისის მოვლენები აღწერა. უწყებაში ამტკიცებენ, რომ საქართველოს 33 წლის მოქალაქე ნახევრადავტომატური იარაღით იყო შეიარაღებული და ე.წ. სამხრეთ ოსეთის საზღვარი გადაკვეთა. და მას შემდეგ, რაც რუსმა მესაზღვრეებმა მისი დაკავება სცადეს, 10-მდე გასროლა განახორციელა, საპასუხო სროლის შედეგად კი ის ფეხში მსუბუქად დაჭრეს. რუსეთის საგარეო საქმეთა სამინისტროში ამტკიცებენ, რომ დაკითხვისას მან აღიარა, რომ ოკუპირებული ცხინვალის რეგიონის ე.წ. სახელმწიფო საზღვარი მიზანმიმართულად გადაკვეთა.