ცოტნე ზურაბიანი: კინზინგერის განცხადებამ აჩვენა, რომ დესტრუქციული ოპოზიციის ყველა მცდელობა, მიაღწიონ მერკანტილურ პოლიტიკურ მიზნებს, ყოველთვის კრახით დასრულდება

კონგრესმენ ადამ კინზინგერის ბოლო განცხადებამ ორი მნიშვნელოვანი რამ გვიჩვენა კიდევ ერთხელ და ძალიან აშკარად: დესტრუქციული ოპოზიციის ყველა მცდელობა, სიცრუითა და დეზინფორმაციით, მათ შორის, ჩვენს სახელმწიფოებრიობაზე თავდასხმებით მიაღწიონ მერკანტილურ პოლიტიკურ მიზნებს, ყოველთვის კრახით დასრულდება,- ასე ეხმაურება საქართველოს პარლამენტის წევრი, ცოტნე ზურაბიანი კონგრესმენ ადამ კინზინგერის განცხადებას იმის შესახებ, რომ საქართველოს წინააღმდეგ სანქციების დაწესება კონგრესში განხილვის თემა არასდროს ყოფილა.

„და მეორე, ამერიკის შეერთებული შტატები ჩვენი უმნიშვნელოვანესი სტრატეგიული პარტნიორია, ამერიკელი ხალხი და სახელმწიფო გვერდით გვიდგას განვითარების პროცესში, და ეს არასდროს დადგება კითხვის ნიშნის ქვეშ“,- განაცხადა ცოტნე ზურაბიანმა.​

რესპუბლიკელმა კონგრესმენმა, ადამ კინზინგერმა „იმედთან“ ინტერვიუში განაცხადა, რომ ამერიკის კონგრესში საქართველოს წინააღმდეგ სანქციების ამოქმედებაზე საუბარი არასდროს ყოფილა.

აშშ-ის წარმომადგენელთა პალატის ასიგნებების კომიტეტმა კანონპროექტი წარადგინა, რომელშიც 2021 ფისკალური წლისთვის სახელმწიფო დეპარტამენტის, საგარეო ოპერაციებისა და მასთან დაკავშირებული პროგრამების დაფინანსების პრიორიტეტებზეა საუბარი.

დოკუმენტში ასევეა საუბარი საქართველოსთვის გასაწევ დახმარებაზე. კერძოდ, კანონპროექტში გაწერილია, რომ საქართველო 2021 წელს დახმარების სახით არანაკლებ 132 025 000 დოლარს მიიღებს.