კელი დეგნანი: ჩვენ ვეხმარებით საქართველოს მათ შორის არჩევნების კუთხით იმ ახალ გამოწვევებთან გამკლავებაში, როგორიცაა კიბერუსაფრთხოება

ჩვენ ვეხმარებით საქართველოს სხვადასხვა მიმართულებით, მათ შორის არჩევნების კუთხით იმ ახალ გამოწვევებთან გამკლავებაში, როგორიცაა კიბერუსაფრთხოება, კიბერთავდასხმები, - ამის შესახებ საქართველოში აშშ-ის ელჩმა, კელი დეგნანმა ცესკო-ში განახლებული სასერვერო ინფრასტრუქტურის გახსნისას ჟურნალისტებს განუცხადა.

მისი თქმით, აშშ-ს საელჩო, აშშ-ს საერთაშორისო განვითარების სააგენტო ცესკო-სთან დიდი ხანია თანამშრომლობს.

„მიუხედვად იმისა რომ საკმაოდ პატარა ოთახია, სადაც არის თანამდეროვე აღჭურვილობა , ის საარჩევნო პროცესის უფრო მეტად დაცულობას დაეხმარება. აშშ-ს საელჩო, აშშ-ს საერთაშორისო განვითარების სააგენტო ცესკო-სთან დიდი ხანია თანამშრომლობს. ჩვენ ვეხმარებით საქართველოს სხვადასხვა მიმართულებით, მათ შორის არჩევნების კუთხით იმ ახალ გამოწვევებთან გამკლავებაში, როგორიცაა კიბერუსაფრთხოება, კიბერთავდასხმები, პანდემიის პერიოდი, იმისათვის, რომ ქართველმა ამორჩეველმა არჩევნებზე თავისუფლად, უსაფრთხოდ მისცეს ხმა. შესაბამისად, ეს ახალი ტექნოლოგიები, რაც დღეს გავხსენით, ძალიან მნიშვნელოვანი იქნება ამ პროცესში“, - განაცხადა კელი დეგნანმა.

ცნობისთვის, ცენტრალურ საარჩევნო კომისიაში (ცესკო) სასერვერო ინფრასტრუქტურის გახსნის ცერემონია გაიმართა. ღონისძიება აშშ-ის ელჩმა საქართველოში კელი დეგნანმა, აშშ-ის საერთაშორისო განვითარების სააგენტოს (USAID) მისიის ხელმძღვანელმა პიტერ ვიბლერმა და ცესკოს თავმჯდომარე თამარ ჟვანიამ გახსნეს.

კიბერუსაფრთხოების გაუმჯობესების მიზნით, ცენტრალური საარჩევნო კომისიის სასერვერო ინფრასტრუქტურა ამერიკული დახმარების ფარგლებში განახლდა, რაც ცესკოს შესაძლებლობას აძლევს მაქსიმალურად შეამციროს კიბერუსაფრთხოებასთან დაკავშირებული რისკები.

საარჩევნო ადმინისტრაციის სათანადო საინფორმაციო ტექნოლოგიური აღჭურვილობით უზრუნველყოფა და თანამშრომლების კიბერუსაფრთხოების და კიბერჰიგიენის მიმართულებით გადამზადება განხორციელდა საარჩევნო სისტემების საერთაშორისო ფონდის (IFES) პროექტის - „საარჩევნო და პოლიტიკური პროცესების მხარდაჭერა საქართველოში“ (EPPS) ფარგლებში, აშშ-ს საერთაშორისო განვითარების სააგენტოს (USAID) მეშვეობით.

აღნიშნულ საკითხებთან დაკავშირებით საარჩევნო ადმინისტრაციის ხელმძღვანელობასა და USAID-ის და IFES-ის წარმომადგენლებს შორის შეთანხმება ჯერ კიდევ მიმდინარე წლის იანვარში შედგა. ცესკოში გამართულ შეხვედრაზე მხარეები 2020 წლის არჩევნების უსაფრთხო და მშვიდ გარემოში ჩატარების ხელშეწყობაზე შეთანხმდნენ.

გაფორმდა სამხრივი ხელშეკრულება, ცენტრალურ საარჩევნო კომისიას, საარჩევნო სისტემების საერთაშორისო ფონდსა და კომპანია „იუ-ჯი-თი“-ის შორის, რომლის საფუძველზე „იუ-ჯი-თი“-იმ ცესკოსთვის შეიძინა სერვერები და სასერვეროს გამართვა-აღჭურვისათვის საჭირო შესაბამისი მოწყობილობები.