გიგი უგულავა: ხელისუფლებასთან რაიმე ტიპის კოალიციის შექმნა არასდროს, არც ერთ მონაკვეთში არ განხილულა

არასდროს, არც ერთ მონაკვეთში არ განხილულა ხელისუფლებასთან რაიმე ტიპის კოალიციის შექმნა. პირიქით, ივანიშვილის „ქართული ოცნება“ დამარცხების შემდეგ უპირობოდ უნდა წავიდეს ოპოზიციაში და შესაბამისად, ქვეყანას იქითა ნაპირიდან უნდა შეხედოს“, - განაცხადა „ევროპული საქართველოს“ ლიდერმა გიგი უგულავამ.

მან ასევე გააკრიტიკა ჟურნალისტები და განაცხადა, რომ მათ 2-3 კვირის ან ერთთვიანი მეხსიერება აქვთ.

„ძალიან ვწუხვარ, რომ თქვენ, ჟურნალისტებს, 2-3 კვირის ან ერთთვიანი მეხსიერება გაქვთ. შეგახსენებთ, ერთი წლის წინ პირადად მე და „ევროპული საქართველო“ გამოვედით ინიციატივით და მოვუწოდეთ ყველა პოლიტიკურ პარტიას ოპოზიციაში, რომ არ შევუქმნათ კოალიცია „ქართულ ოცნებას“. მაშინ ძალიან ბევრი პარტია გამოგვეხმაურა და ძალიან ბევრმა პარტიამ ეს აიტაცა. სწორედ ამ პროცესის გაგრძელებაა და ჩვენ სექტემბერში უკვე წინასაარჩევნოდ, ამას დეკლარაციის სახეს მივცემთ. ასე რომ, „ევროპული საქართველო“ ამ პროცესის ავანგარდში იდგა, დგას და იდგება. თავისთავად ცხადია არასდროს არც ერთ მონაკვეთში არ განხილულა ხელისუფლებასთან რაიმე ტიპის კოალიციის გაკეთება. პირიქით, ივანიშვილის „ქართული ოცნება“ უპირობოდ უნდა დამარცხების შემდეგ წავიდეს ოპოზიციაში და შესაბამისად იქითა ნაპირიდან უნდა შეხედოს ქვეყანას. ნახოს ის შეცდომები, რაც მათ დაუშვეს. ამიტომ, ამ თვალსაზრისით აბსოლუტურად გამჭვირვალეა. მეტსაც გეტყვით შეგიძლიათ დაგუგლოთ, „ევროპული საქართველო“ ამის ინიციატორია და მე პირადად ვარ ამის ინიციატორი. დაახლოებით ერთი წლის წინ“, - დაასძინა „ევროპული საქართველოს“ ლიდერმა გიგი უგულავამ ჟურნალისტებთან საუბრისას.

უგულავას თქმით, „ევროპული საქართველო“ თავისი პოზიციის ერთგულია, რაც მდგომარეობს ბიძინა ივანიშვილის „ერთპარტიული და ერთპიროვნული“ მმართველობის დასრულებაში.

„მიმაჩნია, რომ ცოტა სასაცილოა, არდაჭერილი დათვის გატყავებას ჰგავს ეს დისკუსია, რომელიც ჩვენ არ გაგვიხსნია. ჩვენ, „ევროპული საქართველო“, ვართ ერთგული იმ პოზიციის, რომ ივანიშვილის ერთპარტიული და ერთპიროვნული მმართველობა უნდა დასრულდეს. უნდა დასრულდეს ევროპული ტიპის კოალიციური მმართველობით და ასეც მოხდება. იმიტომ რომ, პროპორციული სისტემა, რომლის გამოც ამდენმა ადამიანმა იბრძოლა, ამხელა წინააღმდეგობას გაუძლო და მე მინდა გითხრათ, რომ ეს ბრძოლა ერთი წელია არ დაწყებულა, ეს ბრძოლა დაწყებულია დაახლოებით 89 წლიდან. ძალიან ბევრი თაობის ადამიანი და პოლიტიკოსი იბრძოდა ამისთვის. პროპორციული სისტემა იმას ნიშნავს, რომ ქვეყანაში არცერთი ხელისუფლება არ იქნება ბატონი, არამედ იქნება მსახური, ისევე როგორც არის ეს ევროპაში. ამიტომ ეს ისტორიული გზაგასაყარი და ეს ისტორიული მომენტი დგება და მე დარწმუნებული ვარ, მას შემდეგ, როდესაც 31 ოქტომბერს დაფიქსირდება, ჯამურად, ოპოზიციის უპირატესობა „ქართულ ოცნებაზე“, შემდეგ უკვე დაიწყება ის კოალიციური მოლაპარაკებები, რომლებიც ბუნებრივია ჩვენი სინამდვილისთვის ახალია, მაგრამ ასე იყო ევროპაშიც ერთი საუკუნის წინ და შესაბამისად, ეს უნდა დავიწყოთ. კოალიციური მმართველობა იმას ნიშნავს, რომ არცერთი ადამიანის, ან არცერთი ჯგუფის ხუშტურზე აღარ ივლის ქვეყანა და ნაცვლად ბატონისა გვეყოლება მსახური მთავრობა“, - განაცხადა უგულავამ.

„ევროპული საქართველოს“ ლიდერმა კომენტარი ოპოზიციურ პარტიებში მიმდინარე შიდა დაპირისპირებებზეც გააკეთა.

მისი თქმით, განსხვავებული აზრი ყოველთვის საჭიროა, რადგან ნებისმიერი ავტორიტარული მმართველობისკენ მიდრეკილი რეჟიმი, სწორედ ამით განირჩევა პლურალისტური, ევროპული საზოგადოებისგან.

„ღმერთმა ნუ ქნას, რომ არ იყოს განსხვავებული აზრი და პოზიცია. განსხვავებული აზრი რომ არ არის, იმიტომ არის ცუდად საქმე და იმიტომ არის განგრენის მდგომარეობაში „ქართული ოცნება“. ნებისმიერი ავტორიტარული მიდრეკილი რეჟიმი, ზუსტად მაგით გამოირჩევა პლურარისტული ევროპული საზოგადოებისგან, რომ უნდა იყოს განსხვავებული აზრი. განსხვავებული აზრი არის წინაპირობა, რომ ცივილიზებული ხალხი დაჯდება საბოლოოდ და შეთანხმდება. აი, ეს არის განსხვავება დღევანდელ ოპოზიციასა და „ქართულ ოცნებას“ შორის. „ქართული ოცნება“ არა შეთანხმების, არამედ იძულებისა და დაშინების გზით მიდის. ეს არის გზა, რომელსაც არაფრისკენ არ მივყავართ. და აქამდე მოიყვანა ქვეყანა. ამიტომ, მე არანაირ შეუთანხმლებლობაზე არ ვლაპარაკობ. ბუნებრივია, განსხვავებები არის, შეიძლება იყოს და არის კიდეც მკვეთრი განსხვავებები“, - განაცხადა უგულავამ.