„ევროპული საქართველოს“ ოფისში გაერთიანებული შტაბის მეორე შეხვედრა იმართება

დღეს „ევროპული საქართველოს“ ოფისში გაერთიანებული შტაბის მეორე შეხვედრა იმართება. შტაბის ინფორმაციით, შეხვედრას მთავარი ოპოზიციური პარტიები ესწრებიან.

როგორც „ევროპული საქართველოს“ მაჟორიტარობის კანდიდატმა გორსა და კასპში, ლევან თარხნიშვილმა განაცხადა, შეხვედრაზე იქნება საუბარი იმ მექანიზმებზე, რომლითაც ოპოზიციური პარტიები დაიცავენ თითოეული მოქალაქის ხმას. ლევან თარხნიშვილმა აღნიშნა, რომ წინასაარჩევნო პერიოდში, ოპოზიციურ პარტიებს შორის მოხდება ინფორმაციის გაცვლა, რაიმე დარღვევების შემთხვევაში კი მოხდება ერთიანი საჩივრების შეტანა, რომელიც შემდეგში სასამართლოშიც და ცენტრალურ საარჩევნო კომისიაშიც ერთიანად გასაჩივრდება.

„დღეს არის მეორე შეხვედრა გაერთიანებული შტაბის, რომელშიც შედის ყველა მთავარი ოპოზიციური პარტია და ჩვენ გადავწყვიტეთ, რომ შეხვედრები იქნება რიგრიგობით სხვადასხვა პარტიის ოფისში. დღეს, ევროპული საქართველო მასპინძლობს ამ შეხვედრას, გარდა ამისა ვაპირებთ რეგიონებში გასვლას. რაც შეეხება კონკრეტულ მექანიზმებს, ის რაც პირველ შეხვედრაზე ითქვა და დღეს ასევე გავრცობილი იქნება, არის ის, რომ ჩვენ ვაპირებთ ინფორმაციის მიმოცვლას, ამ ორი თვის განმავლობაში, როდესაც საარჩევნო კამპანია იქნება, ჩვენ ვაპირებთ ასევე ერთიანი საჩივრების შეტანას, თუ ასეთი აუცილებლობა იქნება აქ და ყველა პარტია მოაწერს ხელს ამას და თუ ეს სასამართლოში გადავა, ყველა ერთად დავიცავთ ჩვენ ინტერესებს, არჩევნების წინა, რამდენიმე დღე, არჩევნების დღეს, და შემდეგი დღეები იმოქმედებს უკვე გაერთიანებული ოფისი, სადაც შეგროვდება ყველა ინფორმაცია. შესაბამისად, ჩვენ ვაპირებთ ყოველი მოქალაქის ხმის დაცვას ადგილებზე, ოლქებში და შემდეგში უკვე ცენტრალურ საარჩევნო კომისიაში. რაც შეეხება მექანიზმებს, არის კონკრეტული მექანიზმები ამისათვის და დღევანდელ შეხვედრაზეც იქნება საუბარი ამაზე“, - განაცხადა ლევან თარხნიშვილმა.