ანრი ოხანაშვილი: შთაბეჭდილება დაგვრჩა, რომ „ნაციონალურ მოძრაობას“ არჩევნების ჩატარება საერთოდ არ უნდა

ატიული წინადადება იდეას გვთავაზობდა, რომ აპრიორი უნდა დადგეს კითხვის ქვეშ ნებისმიერ საარჩევნო უბანზე მიცემული ხმები, რაც ეწინააღმდეგება საარჩევნო კანონმდებლობის პრინციპებს, - ამის შესახებ ანრი ოხანაშავილმა განაცხადა. იურიდიული კომიტეტის თავმჯდომარის თქმით, ხმების გადათვლის აუცილებლობა დასაბუთების შემთხვევაში უნდა მოხდეს.

„მთელი რიგი პროცედურები უკვე არსებობს, როცა დასაბუთების შემთხვევაში შესაძლებელია ხმების ახლიდან გადათვლა და სასამართლოს მეშვეობით შესაძლებელია კონკრეტული უბნების გახსნა და ხმების დათვლა. შესაბამისად, აქ სიახლე არ იყო და გამოიწვევს სრულიად ქაოსს. ჩვენს კითხვებზე ვერ მივიღეთ პასუხი, როგორ შეიძლება, თუ ადამიანს აქვს სურვილი ხმების გადათვლა მოხდეს და მეორე არ იზიარებს ამ პოზიციას, ეს ყველაფერი როგორ უნდა მოხდეს? წარმოიდგინეთ, არჩევნებისას ეს საკითხი ყველა უბანზე დაისვას. ეს ემსახურება არა პროცესის დროულ დასრულებას, არამედ პროცესის გაჭიანურებას, რაც არც ერთ საერთაშორისო სტანდარტში არ ჯდება, რომელიც საარჩევნო თემატიკაზე არსებობს“, - აღნიშნა ოხანაშვილმა.

მან „ნაციონალური მოძრაობის“ წინადადებაზეც ისაუბრა და აღნიშნა, რომ ეს პარტია არჩევნებისთვის მზად არ არის.

„შთაბეჭდილება დაგვრჩა, რომ „ნაციონალურ მოძრაობას“ არჩევნების ჩატარება საერთოდ არ უნდა, რადგან ისინი ინიციატივით გამოდიან, რომ თუ რომან გოცირიძე გამოვა და იტყვის, რომ ხმა მისცა „ქართულ ოცნებას“ ან „ნაციონალურ მოძრაობას“, ამას მის მიმართ რეაგირება უნდა მოჰყვეს. ამას გვთავაზობენ. ვიხუმრეთ, თუმცა საკითხს სერიოზულად რომ მივუდგეთ, როგორ ჩანს, „ნაციონალური მოძრაობა“ არჩევნებისთვის მზად არ არის, რადგან იციან, რომ „ქართულ ოცნებას“ მაღალი რეიტინგი აქვს და დაბალი შანსები აქვთ“, - განაცხადა დეპუტატმა.

პარლამენტი დღეს დაჩქარებული წესით, მეორე-მესამე მოსმენით განიხილავს ცვლილებებს, რომლებიც „საქართველოს საარჩევნო კოდექსში” შედის. კანონმდებლებმა ცვლილებები პირველი მოსმენით 2 სექტემბერს მიიღეს. მას მხარი 77-მა დეპუტატმა დაუჭირა. პლენარულ სხდომამდე, იურიდიული კომიტეტის სხდომაზე ეკა ბესელიამ და „ნაციონალურმა მოძრაობამ“ ცვლილებების ალტერნატიული ვერსია წარადგინეს.