გიორგი ვოლსკი: დაახლოებით ათჯერ გამოაცხადა მიხეილ სააკაშვილმა, რომ საქართველოში ხან ღრუბელ-ღრუბელ, ხან ზღვით და ხან ხმელეთით ჩამოდის

პარლამენტის ვიცე-სპიკერ გიორგი ვოლსკის, საქართველოში მიხეილ სააკაშვილის ჩამოსვლასთან დაკავშირებით, სკეპტიკური დამოკიდებულება აქვს. „ცოტა სკეპტიკური დამოკიდებულება მაქვს, ამ ეთიანობასთან და აფორიაქებულ ფაციფუცთან დაკავშირებით. ადამიანმა, რომელმაც დაახლოებით 10-ჯერ გამოაცხადა, რომ ჩამოდის საქართველოში, ყოველი გადაჭარბების და ირონიის გარეშე, ხან ღრუბელ-ღრუბელ, ხან ზღვით და ხან ხმელეთით, კიდევ ერთხელ ცდის ბედს და იქნებ საზოგადოებამ დაივიწყოს ყველაფერი“, - ამის შესახებ პარლამენტის ვიცე-სპიკერმა, „ქართული ოცნების“ ლიდერმა ტელეკომპანია „რუსთავი2“-ის ეთერში განაცხადა.

გიორგი ვოლსკის განცხადებით, საზოგადებას ახსოვს „ნაციონალური მოძრაობის“ სადისტური მმართველობა. „რომელ ეკონომიკურ აღორძინებასა და წინსვლაზეა ლაპარაკი ან ახლა რა კრიზისზეა საუბარი, თუ არ ჩავთვლით იმას, რაც მთელ მსოფლიოში ხდება. ძლივს სამუშაო ადგილების შექმნა დაიწყო და ბიზნესმა გაიღვიძა“, - აღნიშნა ვოლსკიმ.

პარლამენტის ვიცე-სპიკერის განცხადებით, თუ მიხეილ სააკაშვილი საქართველოში ჩამოვა, მას დააკავებენ. „იმდენად თვალსაჩინოა ეს ბრალდებები და ამ ბრალდებების საფუძველზე გამოტანილი გადაწყვეტილება, სადავოც არაფერია. სტრასბურგის სასამართლომ დაადასტურა, რომ სააკაშვილმა მოაწყო ის, რაც გირგვლიანის თემას შეეხება. ზუსტად ვიცით, რომ ერთ-ერთი დეპუტატი პრაქტიკულად მოკლეს და შემთხევით გადარჩა. მართლა ხომ არ ჰგონია ვინმეს, რომ ორ პიჯაკს ეხება ის ფინანსური დარღვევები, რომელიც ჩაიდინა. ქვეყანა სათავისოდ გაიხადა და უამრავი ხალხია, ვინც ამას წლების განმავლობაში ხედავდა“, - განაცხადა ვოლსკიმ.

მისი თქმით, საქართველოში ინფრასტრუქტურული პროექტები კეთდება, ქართულმა კომპანიებმა ამოისუნთქეს და ახლა, ამ რეალობაში რჩება განცდა, რომ დესტრუქცია და რევოლუციური ხაზი იქნება მთავარი.

გაერთიანებულმა ოპოზიციამ პრემიერ-მინისტრობის კანდიდატად მიხეილ სააკაშვილი ოფიციალურად დაასახელა. საქართველოში დაბრუნების გეგმაზე კი სააკაშვილი დღეს ისაუბრებს.