ირაკლი ქადაგიშვილის საარჩევნო შტაბის ხელმძღვანელი ოპოზიციონერი კანდიდატის ბრალდებებს პასუხობს

„ქართული ოცნების“ კანდიდატის, ირაკლი ქადაგიშვილის საარჩევნო შტაბის ხელმძღვანელი პლატონ კალმახელიძე, ახმეტა-თელავი-ყვარელი-ლაგოდეხის ოლქში „ნაციონალური მოძრაობის“ კანდიდატის, გიორგი ბოტკოველის ბრალდებებს პასუხობს, რომლის მიხედვითაც ის ხელისუფლებას საარჩევნო ოლქების დაკომპლექტებაში საჯარო მოხელეების მონაწილეობასა და ადმინისტრაციული რესურსის ჩართულობაში ადანაშაულებს.

პლატონ კალმახელიძე „ნაციონალური მოძრაობის“ კანდიდატს პოლიტიკურ სვლას უწუნებს და ურჩევს, უსაფუძვლო ბრალდებამდე, საჯარო სამსახურში იმ ოჯახის წევრის თანამდებობა არ დაავიწყდეს, რომელიც საარჩევნო სიების დაკომპლექტებასა თუ საარჩევნო გარემოს შექმნაში თავადაც უშუალოდ მონაწილეობს.

„დღეს, თურმე ერთ-ერთი პოლიტიკური პარტიის კანდიდატს, გიორგი ბოტკოველს გაუკეთებია განცხადება იმის შესახებ, რომ თითქოს საარჩევნო კომისიები კომპლექტდება მერის წარმომადგენლებით, ნათესაური კავშირით და გამომდინარე აქედან, ეჭვქვეშ აყენებს, რომ კომისიების მუშაობა იქნება მიუკერძოებელი.

მისი მეუღლე, ხათუნა გალდავა, რომელიც მუშაობს ცესკოში, ერთ-ერთ მაღალ თანამდებობაზე, ჯერ დაიწყოს თავისი ოჯახის წევრებიდან. მე გიორგის მინდა პირდაპირ კითხვა დავუსვა, მისი მეუღლე არ პროცესში არის მიუკერძოებელი?

როდესაც საუბარს იწყებს სხვაზე, ჯერ დაიწყოს თავისი ახლო ნათესავებით და ოჯახის წევრებით“, - ამბობს ირაკლი ქადაგიშვილის საარჩევნო შტაბის ხელმძღვანელი.

პლატონ კალმახელიძე პროცესში ხელისუფლების რაიმე სახის მონაწილეობას გამორიცხავს და მისთვის ოპოზიციონერის ბრალდებები საფუძველს მოკლებულია.

„რა თქმა უნდა, მისი ეს ბრალდება მიუღებელია. პროცესი მიმდინარეობს კანონის სრული დაცვით და ასევე წარიმართება არჩევნების დღის ჩათვლით. ჩვენ აუცილებლად მოვიპოვებთ დამაჯერებელ გამარჯვებას“, - განაცხადა პლატონ კალმახელიძემ.