მამუკა მდინარაძე: „ნაციონალურ მოძრაობასა“ და „ევროპულ საქართველოს“ რომ უდევთ მაგიდაზე, იმ კვლევებითაც კი ჩვენი მონაცემი 59%-ია, ამ ინფორმაციას საკუთარ აქტივისტებსაც უმალავენ

ოპოზიციურმა პარტიებმა და რამდენიმე ტელევიზიამ კვლევებით რეალური საარჩევნო პროგნოზი ვერ დადეს, - ამის შესახებ ჟურნალისტებს პარლამენტის თავმჯდომარის მოადგილემ, მამუკა მდინარაძემ წინასაარჩევნოდ გამოქვეყნებულ კვლევებზე საუბრისას განუცხადა.

„ოპოზიციურმა პარტიებმა და მათმა ტელევიზიებმა ამ დღეებში რაც გამოაქვეყნეს, ყველაფერს რომ თავი დავანებოთ, ალოკაცია რომ არ გააკეთეს, საარჩევნო პროგნოზი რომ არ დადეს, ამის გარდა, ერთმა თქვა, რომ 59%-ს წარმოდგენა არ აქვს ვის აძლევს ხმას. მეორემ გვითხრა, რომ ეს 59 კი არა 23 პროცენტიაო. რეალურად ერთი კითხვა მაქვს: საარჩევნო პროგნოზი (სოციოლოგების საქმე ხომ ეს არის), დღეს რომ არჩევნები ტარდებოდეს რამდენ პროცენტს მიიღებდა „ქართული ოცნება“, რა თქვა „ფორმულამ“? 38 პროცენტი პირდაპირი გამოკითხვის გზით ანუ მხარს უჭერს „ქართულ ოცნებასო“, მაგრამ 23 პროცენტიდან ვერ მივიღეთ პასუხიო. ვარაუდის საფუძველი რომ ყოფილიყო, ალოკაცია არ გავაკეთეთო, ანუ საარჩევნო პროგნოზი ეს არ არის. ნახევარფაბრიკატი მოგვცეს, ისიც ტყუილი. თუ ალოკაცია შეეძლოთ, მაგალითად მაჟორიტარებზე, იგივე რატომ არ გააკეთეს პარტიაზე? წარმოიდგინეთ რამხელა მანიპულაციაა მაჟორიტარებზე, ოღონდ ერთი ათი პროცენტის დაკლებით, გააკეთეს ვითომ ალოკაცია და პარტიაზე არ გააკეთეს. თუ ალოკაცია შეიძლებოდა მაჟორიტარზე, გასაგებია გაყალბებული მონაცემით, მაგრამ მაინც, რატომ არ შეიძლებოდა იგივე პარტიაზე?“, - აღნიშნა მამუკა მდინარაძემ.

მისი შეფასებით, ოპოზიციური პარტიები კვლევების რეალურ სურათს, საკუთარ აქტივისტებსაც უმალავენ.

„წარმოუდგენელი ციფრებია მაშინ, როდესაც ოპოზიციური პარტიების მიერ გამოქვეყნებული ორი კვლევა ასე „ემთხვევა“ ერთამანეთს. როდესაც ერთში წერია, რომ 59 პროცენტია გადაუწყვეტელი და მეორეში - 23, ამაზე ვეღარ გააგრძელებ მსჯელობას. წარმოუდგენელია რომელიმე კვლევაზე საუბარი, სადაც გეუბნებიან, რომ ალოკაციას არ ვაკეთებთ და საარჩევნო პროგნოზს არ ვდებთო. კითხვაზე - რა იქნებოდა დღეს რომ არჩევნები ტარდებოდეს, ოთხი ორგანიზაციიდან მხოლოდ ორმა გასცა პასუხი. ერთმა თქვა, რომ 56% აქვს „ქართულ ოცნებას“ და მეორემ თქვა, რომ მინიმუმ 56 პროცენტი - იმიტომ, რომ ოთხი პროცენტი „გორბმა“ დატოვა ალოკაციის გარეშე. გარდა ამისა, „სიარარსიმ“ თქვა გადაწყვეტილიდან 63 პროცენტი და „ფორმულამ“ გადაწყვეტილიდან 49 პროცენტი. ოღონდ 38/39-ზე დამჯდარიყო, ალოკაცია არ გააკეთეს. გაყალბებული მონაცემებით ალოკაციაც კი არ გააკეთეს, რაღაზე ვლაპარაკობთ, წარმოუდგენელი ციფრებია. „ნაციონალურ მოძრაობასა“ და „ევროპულ საქართველოს“ რომ უდევთ მაგიდაზე, იმ კვლევებითაც კი ჩვენი მონაცემი არის 59 პროცენტი. ინფორმაციას გეუბნებით, რომელზეც ვიხვეწებით, რომ გამოაქვეყნონ და უმალავენ თავიანთ აქტივისტებსაც კი“, - განაცხადა მამუკა მდინარაძემ.

მისი აზრით, ბოლო პერიოდში გამოქვეყნებული კვლევებიდან რეალურთან მიახლოებული მხოლოდ „რუსთავი2“-ისა და „გორბის“ მიერ დადებული პროგნოზებია.

„ჩვენ ვიხილეთ „ფორმულას“ მიერ გამოქვეყნებული გაყალბებული მონაცემები მაჟორიტარებზე ალოკაციით და ალოკაციის გარეშე პარტიის მონაცემები. არ ვიცი რომელი მეთოდით მუშაობენ „ედისონ რისერჩის“ ქართველი ქვეკონტრაქტორები. არ და ვერ მეუბნებით ვინ არიან ისინი. საარჩევნო პროგნოზი რა დადეთ? - დღეს რომ საქართველოში არჩევნები ტარდებოდეს, რამდენ პროცენტს მიიღებდა ოპოზიცია და რამდენ პროცენტს ქართული ოცნება? თქვენ მეუბნებით 38 და 39-ო და ასეთი არ არსებობს, დანარჩენი? არჩევნებზე 100%-დან ითვლება. ანუ პროგნოზი არ დადეთ, პროგნოზი ვერ დადეთ და ეს არის შეგნებულად, იმიტომ, რომ არ შეიძლება სხვა მონაცემებზე სერიოზული საუბარი, როცა ერთი ოპოზიციური არხის მიერ გამოქვეყნებული მონაცემით 59 პროცენტია გადაუწყვეტელი ამომრჩეველი, მეორე კი ამბობს, რომ 23 პროცენტია ასეთი. წარმოიდგინეთ აცდენა. რეალურთან მიახლოებული და არა ბოლომდე რეალური იყო, ერთი, ბრიტანელების მიერ ჩატარებული კვლევა, რომელიც გამოაქვეყნა „რუსთავი2“-მა. „გორბს“ რომ ბოლომდე გაეკეთებინა იმ ოთხი პროცენტის ალოკაცია თუ შეწონვა, მმართველი პარტიის რეიტინგი იქნებოდა გაცილებით მაღალი“, - განაცხადა მამუკა მდინარაძემ.