ნაგავსაყრელების მოწესრიგების გეგმა თბილსერვისმა 19 ივნისამდე უნდა წარმოადგინოს

თბილისის საკრებულოს ადამიანის უფლებათა კომისიამ, "თბილსერვის ჯგუფს" თბილისის ნაგავსაყრელების მოსაწესრიგებლად ვადა 19 ივნისამდე მისცა. ინფორმაციას 1tv.ge ავრცელებს.

თბილსერვისმა 19 ივნისამდე კომისიას უნდა წარუდგინოს გეგმა, რომელშიც ვადების მითითებით, გაწერილი უნდა იყოს დიდი ლილოს, ნასაგურისა და წინუბნის მიმდებარე ტერიტორიაზე მდებარე საყოფაცხოვრებო ნარჩენების პოლიგონზე, ახალი, ადეკვატურ სამუშაოთა ჩამონათვალი.

"ფაქტობრივად 3 წლის წინ დაწყებული პროცესები მხოლოდ ახლა იწყებს კონკრეტული მიმართულებით განვითარებას. ჩვენ არაერთხელ აღვნიშნეთ, რომ საკითხი ძალზე პრიორიტეტულია და არ შეიძლება დროში იყოს ასე გაწელილი. ვფიქრობ, როგორც თბილისის მერიას ისე ცენტრალურ ხელისუფლებას მეტი ყურადღება უნდა დაეთმოთ ამ საკითხის სწრაფი და ეფექტური მოგვარებისათვის. „თბილსერვის ჯგუფს“ და კომპანია „გამას“  მეტი ყურადღება უნდა გამოეჩინათ კანონში შესულ ცვლილებებთან დაკავშირებით და ტენდერი არ გამოეცხადებინათ უკვე ძალადაკარგული ნორმების მითითებით პროექტში. თბილისის მერიას ყველაფერი უნდა ეღონა იმისათვის, რომ დროულად და არა დაგვიანებით შესულიყო ბიუჯეტში საჭირო თანხები“, - განაცხადა კომისიის ხელმძღვანელმა გულიკო ზუმბაძემ.

ტენდერში გამარჯვებულ კომპანიას პოლიგონზე სამუშაოები 2016 წლის ივნისში უნდა დაეწყო  და 2017 წლის აპრილში უნდა დაესრულებინა.