გიორგი ვაშაძე: მიხეილ სააკაშვილმა ყველაზე დიდი შეცდომა დაუშვა მაშინ, როდესაც საკუთარი თავი პრემიერ-მინისტრობის კანდიდატად წარადგინა

ოპოზიციის საერთო ფრონტი კი არ უნდა მოარღვიო თუ შენ ხარ ყველაზე ძლიერი ოპოზიციური ძალა, უნდა იყო გამაერთიანებელი და მაკონსოლიდირებელი. მიხეილ სააკაშვილმა ყველაზე დიდი შეცდომა დაუშვა მაშინ, როდესაც საკუთარი თავი პრემიერ-მინისტრობის კანდიდატად წარადგინა, - ამის შესახებ პარტია „სტრატეგია აღმაშენებელის“ თავმჯდომარემ, გიორგი ვაშაძემ „რუსთავი 2“-ის ეთერში განაცხადა.

„ჩვენი მხარდაჭერა გაიზარდა, ხოლო „ნაცმოძრაობის“ შემცირდა, იცით რატომ? იმიტომ რომ ოპოზიციური ფრონტის ჩამშლელად ყველა „ნაციონალურ მოძრაობას“ ხედავს. როდესაც ამბობ, რომ ხარ მთავარი ოპოზიციური ძალა, შეგირცხვეს ცხვირი, როდესაც ოპოზიციასვე ესხმი თავს. გაასწორე სამიზნე“, - აცხადებს გიორგი ვაშაძე.

მიხეილ სააკაშვილმა განაცხადა: „მე ვხედავ საზოგადოების კოალიციას, მე საერთოდ ვერ ვხედავ პარტიულ კოალიციას. არ მჯერა პარტიებისა და პარტიუკების, არ მჯერა პოლიტიკანობის. მე მჯერა სახელმწიფო მოღვაწეების, ინოვაციის, ფართო საზოგადოებრივი ხედვის, პატრიოტიზმის, ფართო საზოგადოების გაერთიანების. ახლა გვჭირდება სტაბილიზაცია. ნაციონალური მოძრაობა ამ არჩევნებზე უმრავლესობას ან აიღებს, ან საქართველო დაიღუპება“, - აცხადებს საქართველოს მესამე პრეზიდენტი.

7 სექტემბერს „ნაციონალურმა მოძრაობამ“ მიხეილ სააკაშვილი პრემიერ-მინისტრობის კანდიდატად ოფიციალურად წარადგინა.

საქართველოში საპარლამენტო არჩევნები 31 ოქტომბერს ჩატარდება.