სოზარ სუბარი: „ნაცმოძრაობის“ წევრები პირდაპირ მიაკუთვნებდნენ დავით გარეჯს აზერბაიჯანს, როცა ჯერ არაფერი იყო შესწავლილი

როდესაც პროკურატურის განცხადება მოვისმინე, ამოვწიე „ნაციონალური მოძრაობის“ წევრების ძველი განცხადებები, რომლებიც საოცრებებს ამბობდნენ, როდესაც ჯერ არაფერი არ იყო დადასტურებული, - ამის შესახებ ტელეკომპანია „იმედის“ გადაცემაში „არენა“ სამგორის მაჟორიტარულ ოლქში „ქართული ოცნების“ კანდიდატმა, სოზარ სუბარმა განაცხადა.

მისივე თქმით, „ნაციონალური მოძრაობის“ მმართველოს პერიოდში ხელისუფლების წარმომადგენლები პირდაპირ მიაკუთვნებდნენ ამ ტერიტორიას აზერბაიჯანს ისე, რომ ჯერ არაფერი იყო შესწავლილი და დამტკიცებული.

„დღეს პროკურატურაში გაკეთდა განცხადება დავით გარეჯთან დაკავშირებით და ეს საკითხი ძალიან მაინტერესებს. დავით გარეჯი ყველა ქართველისთვის ძვირფასია, ჩემთვის კი განსაკუთრებით, იმიტომ რომ იქ ვიბრძოდი რუსული პოლიგონის გასატანად. როდესაც ტაძრის კურთხევა მოხდა, იქ მხოლოდ ორი ადამიანი ვცხოვრობდით - მე და მეუფე აბბა დავითი. ერთი წელი იქ ვიმსახურე და ჩემთვის იმაზე დიდი და წმინდა ადგილი არ არსებობს. აზერბაიჯანი ჩვენი სტრატეგიული მოკავშირეა და ყველა საკითხი მოლაპარაკებების გზით უნდა გადაწყდეს. როდესაც პროკურატურის განცხადება მოვისმინე, ამოვწიე „ნაციონალური მოძრაობის“ წევრების ძველი განცხადებები, რომლებიც საოცრებებს ამბობდნენ, როდესაც ჯერ არაფერი არ იყო დადასტურებული. მაგალითად, ნიკა რურუა ამბობდა, რომ ეს ისტორიული უკუღმართობის ბრალია, მაგრამ ეს უკვე აზერბაიჯანის ტერიტორიაა, ისევე როგორც ტაო-კლარჯეთი იყო ოდესღაც საქართველო, მაგრამ დღეს თურქეთია. ჯერ კიდევ დოკუმენტების შესწავლამდე და საზღვრის დელიმიტაციამდე, მან პირდაპირ მიაკუთვნა ეს ტერიტორია აზერბაიჯანს. ბუნებრივია, ჩვენ არ ვკამათობთ მონასტრის იმ მონაკვეთზე, რომელიც საბჭოთა პერიოდშიც ჩვენი საზღვრის იქით იყო, მაგრამ ჩიჩხიტურიც და უდაბნოც საბჭოთა პერიოდში იყო ჩვენს ტერიტორიაზე. ნინო კალანდაძეც ამბობდა, რომ „საბჭოთა დროიდან მოყოლებული ეს იყო არა საქართველოს, არამედ აზერბაიჯანის ტერიტორია“. ამაზე საკმაოდ მკაცრი პასუხი ჰქონდა საპატრიარქოს და მოგვიანებით აქციაც გაიმართა. ასე ხელაღებით რატომ მიაკუთვნეს ეს ტერიტორია აზერბაიჯანს? ძალიან საინტერესოა, რა იდგა ამის უკან? იქ არის ტერიტორიები, რომლებზეც არასდროს გვქონია დავა. ბერთუბანი მონასტრის ნაწილია, ქართული კულტურის ძეგლია, მაგრამ დღეს აზერბაიჯანის ტერიტორიაზეა, ისევე როგორც ოშკი - თურქეთში. როდესაც ბერთუბანში რესტავრაცია იწყებოდა, ჩვენ აზერბაიჯანის სახელმწიფოსგან ვიღებდით ნებართვას და შემდეგ ჩადიოდნენ რესტავრატორები, მაგრამ უდაბნოსთან დაკავშირებით პრობლემა არასოდეს ყოფილა და აზერბაიჯანთან არაფერი ყოფილა შესათანხმებელი“, - განაცხადა სუბარმა.

29 სექტემბერს პროკურატურამ გაავრცელა განცხადება, რომლის თანახმადაც, პროკურატურის საგამოძიებო ნაწილში მიმდინარეობს გამოძიება სისხლის სამართლის საქმეზე, უცხო ქვეყნისათვის საქართველოს ტერიტორიის ნაწილის გადაცემისკენ მიმართული მოქმედების განხორციელების ფაქტზე, საქართველოს სისხლის სამართლის კოდექსის 308-ე მუხლის პირველი ნაწილით გათვალისწინებული დანაშაულის ნიშნებით.

გამოძიების დაწყებას საფუძვლად დაედო 2020 წლის 17 აგვისტოს, საქართველოს თავდაცვის სამინისტროდან მიღებული წერილობითი ინფორმაცია, რომელიც შეეხებოდა საქართველოს სახელმწიფო საზღვრების დელიმიტაციისა და დემარკაციის სამთავრობო კომისიის საქმიანობას.