სოზარ სუბარი „ნაციონალურ მოძრაობაზე“: დამარცხდებიან, რადგან ძალადობის, ყაჩაღობისა და რეკეტის დრო წასულია

ამ დრომდე, წინასაარჩევნო პროცესი ძალიან მშვიდად მიდიოდა. მოხდა გარკვეული ინციდენტები და იმედი მაქვს, რომ ეს შემთხვევები ძალიან მალე იქნება გამოძიებული, თუმცა, ის რაც ბოლო დღეებში მოხდა ბოლნისსა და მარნეულში, ძალიან სერიოზულ გამოძიებას საჭიროებს და ყველა ადამიანმა უნდა აგოს პასუხი. ეს მთავარი პრევენციაა, - ამის შესახებ ,,ქართული ოცნება -დემოკრატიული საქართველოს“ სამგორის რაიონის მაჟორიტარი დეპუტატობის კანდიდატმა, სოზარ სუბარმა ტელეკომპანია „იმედის“ ეთერში, გადაცემაში „არენა“, მარნეულში მომხდარ ინციდენტთან დაკავშირებით საუბრისას განაცხადა.

„არც პოლიციას და არც პროკურატურას არ სჭირდება ჩემი მოწოდება, რომ სწრაფად და ობიექტურად უნდა გამოიძიონ მომხდარი, რადგან ამას ისედაც აკეთებენ. სწორედ ესაა პრევენცია - ყველამ უნდა აგოს პასუხი. ორივე შემთხვევაში ფაქტი სახეზეა - ჩხუბი, ინციდენტი, თავდასხმა მოხდა იქ, სადაც მოვიდნენ „ნაციონალური მოძრაობის“ წევრები, იმ ტერიტორიაზე, სადაც „ქართული ოცნების“ წარმომადგენლები იყვნენ. დაესხნენ თავს და მიაყენეს შეურაცხყოფა. ვინ ვის უფრო ძლიერად დაარტყა, ეს ცალკე საკითხია. ყველანაირი ძალადობა, თუნდაც საპასუხო, უნდა აღმოიფხვრას. არ გამოვრიცხავ, რომ შეიძლება, იყოს რომელიმე მხარის წარმომადგენელი, რომელმაც, შესაძლოა, სრულიად შეუგნებლად ან შეგნებულად გააკეთა ეს. ცხადია, ეს უნდა იყოს გამოძიებული. ფაქტი, თუ ვის აწყობს ეს, ჩანს იქიდან, თუ ვინ მიდის პროვოკაციაზე, ვინ მიდის იქ, სადაც არიან „ქართული ოცნების“ წარმომადგენლები, ან მიდიან გინებითა და მუქარით ადგილობრივი საარჩევნო კომისიის ოფისში“ - განაცხადა სოზარ სუბარმა.

მაჟორიტარი დეპუტატობის კანდიდატმა წინა ხელისუფლების დროს მომხდარ შემთხვევებზეც ისაუბრა და აღნიშნა, რომ „ნაციონალური მოძრაობა“ მომავალ არჩევნებზე დამარცხდება, რადგან ძალადობის, ყაჩაღობისა და რეკეტის დრო წასულია.

„2012 წელს გორში ვიყავი, როდესაც დაგვიშინეს ქვები. ეს იყო თავდამსხმელთა გავეშებული ბრბო, როცა ადამიანებს, ამ სიტყვის პირდაპირი მნიშვნელობით, ადამიანებს იტაცებდნენ. როცა, მაგალითად, სადღაც მივდიოდით მანქანების კოლონით, კუდ-ის მანქანები დგებოდნენ შუაში, ერთ-ორ მანქანას გამოაცალკევებდნენ, მოიტაცებდნენ ადამიანებს, ავტომობილებს, მიკროავტობუსებს, რომელთაც ჩვენ ვქირაობდით, უხვრეტდნენ საბურავებს, მძღოლებს ართმევდნენ მართვის მოწმობას ან უზიანებდნენ მანქანებს. იყო პირდაპირი თავდასხმებიც. აღარაფერს ვამბობ იმაზე, რომ ჯარიმას იყენებდნენ როგორც მთავარ სადამსჯელო იარაღს. ამას იყენებდნენ ჩვენი თანამშრომლებისა თუ პარტიის წევრების, კოალიციაში შემავალი პარტიების წევრების წინააღმდეგ. მაგალითად, ასეთი იყო ბუკია კონსერვატიული პარტიიდან. არაფრის გამო დააჯარიმეს. საოცრება გააკეთეს მესტიაში. მთელი მესტია გაარემონტეს და როცა ვიქტორ ჯაფარიძემ გადაწყვიტა, რომ კენჭი ეყარა „ქართული ოცნებიდან“, 600 ათასი ლარი დააკისრეს სასამართლოს გზით, იმისთვის, რაც ყველას გაუკეთეს და არავის ამაში ფული არ გადაუხდია. სინამდვილეში, მას არაფერში არ სჭირდებოდა ის ე.წ. „რემონტი“. მსგავსი შემთხვევა ძალიან ბევრი იყო, მაგრამ მაინც ვერ დააშინეს ვერავინ. ახლა, მით უმეტეს, დამარცხდებიან, რადგან ძალადობის, ყაჩაღობისა და რეკეტის დრო წასულია“ - განაცხადა სოზარ სუბარმა.