ირაკლი კობახიძე „ნაციონალურ მოძრაობაზე“: ვიცით ორი რამ, ისინი ყველაფერზე არიან წამსვლელები, თუმცა ჭორების დონეზე ვერ ვისაუბრებთ

„უბრალოდ, ჩვენ ვიცით ორი რამ. ისინი ყველაფერზე არიან წამსვლელები. ისინი აგებენ არჩევნებს. ასეთ ვითარებაში, მათ შეუძლიათ ყველაფერი გააკეთონ მათ შორის, ასეთი მძიმე ქმედება განახორციელონ, თუმცა ჭორების დონეზე ჩვენ ვერ ვისაუბრებთ, - ამის შესახებ ,,ქართული ოცნების“ ცენტრალურ ოფისში გამართულ ბრიფინგზე პარტიის აღმასრულებელმა მდივანმა, ირაკლი კობახიძემ „ნაციონალურ მოძრაობასთან“ დაკავშირებით განაცხადა.

მას გუშინ ზუგდიდში, ბანკში შეჭრის ფაქტთან დაკავშირებით ჰკითხეს, რაზეც კობახიძემ განაცხადა, რომ ეჭვების დონეზე საუბრის უფლება ყველას აქვს, თუმცა შესაბამისი განცხადების გასაკეთებლად მათ ინფორმაცია უნდა გააჩნდეთ.

„რეიტინგებიდან გამომდინარე, რაც ფიქსირდება და გამომდინარე ჩვენი ოპონენტი პოლიტიკური ძალის ბუნებიდან გამომდინარე, როდესაც ისინი ხელისუფლებაში იყვნენ, არაფერს არ ერიდბოდნენ. გახსოვთ, მაგალითად, არაიმიტირებული ტერაქტები, რომელიც მათი მხრიდან მოქალაქეების წინააღმდეგ იგეგმებოდა და ხორციელდებოდა. შესაბამისად, აქედან გამომდინარე, არის ორი ფაქტორი. ერთი, ამ პოლიტიკური ძალის ბუნებაა ყველაფერზე წამსვლელი. ადამიანები ხშირად იყენებენ ამ ტერმინებს, როდესაც „ნაციონალურ მოძრაობაზე“ საუბრობენ. ეს არის ერთი მნიშვნელოვანი ფაქტორი, რომ ნაცმოძრაობა ყველაფერზეა წამსვლელი, პირდად სააკაშვილი, გვარამია და სხვები, მეორე ფაქტორი არის მათი რეიტინგები. ისინი განწირული არიან ძალიან მძიმე მარცხისთვის და ასეთმა ყველაფერზე წამსვლელმა, პოლიტიკურმა ძალამ შესაძლოა, ყველაფერი გააკეთოს. ამაზე ჩვენ ვმსჯელობდით და დამატებით, ჩვნი მხრიდან პრევენციული განცხადებები გაკეთდება“, - აღნიშნა კობახიძემ.

ზუგდიდის ცენტრში, გამსახურდიას ქუჩაზე მდებარე „საქართველოს ბანკში“ შეიარაღებულმა პირმა მძევლები 21 ოქტომბერს აიყვანა.

თავდამსხმელი შენობიდან 3 მძევალთან ერთად გამოვიდა. როგორც კადრებში გამოჩნდა, მას შენობის დატოვების დროს ერთი ხელი აწეული ჰქონდა და სავარაუდოდ ხელში ხელყუმბარა ეკავა.

22 ოქტომბერს, გამთენიისას შსს-მ გაავრცელა განცხადება, რომლის თანახმად, ავთანდილ გალდავას უშუალო ძალისხმევით შეიარაღებული დამნაშავისგან ყველა მძევალი გათავისუფლდა და მათ სიცოცხლეს და ჯანმრთელობას საფრთხე არ ემუქრება. ხოლო დამნაშავის დაკავების მიზნით სამართალდამცველები ინტენსიურ რეჟიმში აგრძელებენ ოპერატიულ-საგამოძიებო და სამძებრო ღონისძიებებს.