გიორგი გახარია: უნდა გვესმოდეს, რომ არჩევნების დემოკრატიულად, ღიად და ტრანსპარენტულად ჩატარება ყველას ვალდებულებაა

ეს საარჩევნო კამპანია არის უკიდურესად ღია, უკიდურესად გამჭირვალე, - ამის შესახებ საქართველოს პრემიერ-მინისტრმა, გიორგი გახარიამ ჟურნალისტებს განუცხადა.

მისი თქმით, არჩევნების დემოკრატიულად, ღიად და ტრანსპარენტულად ჩატარება ჩვენი ყველას ვალდებულებაა.

„ადმინისტრაციული რესურსის გამოყენება, მოსყიდვა, დაშინება და კიდევ ბევრი ტრაფარეტული სიტყვა, ერთი და იგივე მეორდება და ამის ვერც ერთ დამადასტურებელ ფაქტს ვერ მოიყვანთ. ასეთი დამადასტურებელი ფაქტი თუ იქნება, საარჩევნო კამპანიაში არსებობს სპეციალური მექანიზმები, რომ მოხდეს მისი გასაჩივრება, მათ შორის არსებობს უწყებათაშორისი კომისია. ეს საარჩევნო კამპანია არის უკიდურესად ღია, უკიდურესად გამჭირვალე. ამიტომ, არანაირი პრობლემა, არანაირი რისკი არ არსებობს, რომ მსგავსი ქმედებებით ვინმეს შეეძლება, რეალური ზემოქმედება იქონიოს არჩევნებზე. სამაგიეროდ, არსებობს უფრო შეფარული მექანიზმები, რომელიც დღეს ქალბატონი თეა წულუკიანის ბრიფინგზე მოვისმინეთ. იმასაც უნდა მივაქციოთ ყურადღება, ეს ხომ ყველას საერთო არჩევნებია.

ერთი რამ უნდა გვესმოდეს, არჩევნების დემოკრატიულად, ღიად და ტრანსპარენტულად ჩატარება ჩვენი ყველას ვალდებულებაა. არა მხოლოდ მთავრობის, მოქალაქეების, ოპოზიციის, პარტიების, ყველასი და და ეს იქნება საერთო გამარჯვება და საერთო გამარჯვება, არა რომელიმე პარტიის და „ოცნების“, ქვეყნის. ამიტომ, ამ ამბავშიც, ამ თემაშიც და ამ საკითხშიც ჩვენ უნდა ვიყოთ მოკავშირეები“, - განაცხადა გიორგი გახარიამ.