თეა წულუკიანი „ნაციონალურ მოძრაობაზე“: ეს ის ხალხია, ვინც საკუთარ მარცხს ყოველთვის გამარჯვებად ასაღებს

ჩვენ ვართ საარჩევნო დღის პრაქტიკულად თითქმის ბოლოს და ვხედავთ, რომ „ნაციონალურმა მოძრაობამ“, რადიკალურმა და დესტრუქციულმა ძალებმა უკვე განახორციელეს მცდელობები, რომ ჩართონ ის სცენარი, რომელიც აქვს გამზადებული, მაგრამ მას აღსრულება არ უწერია, - ამის შესახებ „ქართული ოცნების“ პარტიული სიის მეოთხე ნომერმა, თეა წულუკიანმა პარტიის ოფისში გამართულ ბრიფინგზე განაცხადა.

„ჩვენ ვხედავთ ფეიკ ტელევიზიებით და ჟურნალიზმით, ფეიკ პარტიებს და ფეიკ კვლევებს, ეს ის ხალხია ვინც, ის დიდი უბედურება, რაც ჩვენს ქვეყანას დაატყდა თავს 2008 წლის აგვისტოს ომის სახით, იზეიმეს, ეს ის ხალხია, ვინც საკუთარ მარცხს ყოველთვის გამარჯვებად ასაღებს და დღეს საღამოსაც აქვთ ასეთი უბადრუკი მცდელობა, რომ თავიანთივე ამომრჩეველში გააჩინონ ე.წ. მუხტი და ჩართონ ის სცენარი, რომლის ჩართვის პროცესში, როგორც ჩანს, სირთულეებს აწყდებიან“, - აღნიშნა თეა წულუკიანმა.

საქართველოში საპარლამენტო არჩევნები მიმდინარეობს. ამომრჩეველმა არჩევანი დღეს 50 საარჩევნო სუბიექტს - ორ ბლოკსა და 48 პარტიას შორის უნდა გააკეთოს.საპარლამენტო არჩევნებისთვის 38 ქვეყანაში 52 საარჩევნო უბანი გაიხსნა.2020 წლის 31 ოქტომბრის არჩევნებისთვის კოვიდდაწესებულებებში 127 საარჩევნო უბანი მუშაობს.პენიტენციურ დაწესებულებებში კი 10 საარჩევნო უბანი გაიხსნა. არჩევნებს 132 ადგილობრივი და 23 საერთაშორისო ორგანიზაციის წარმომადგენელი აკვირდება. ამასთან, ამერიკული ორგანიზაცია Public Opinion Strategies „იმედის“ დაკვეთით ეგზიტპოლს ატარებს.