არჩილ თალაკვაძე: ცესკოს აქვს სრული საკანონმდებლო მხარდაჭერა, ნებისმიერი ცალკეული ხარვეზი გაასწოროს და მეორე ტურს შევხვდეთ ისევ კონკურენტულ გარემოში

ცესკოს აქვს სრული საკანონმდებლო მხარდაჭერა, ნებისმიერ ცალკეულ ხარვეზში გაერკვეს, გაასწოროს ეს ხარვეზი და მეორე ტურს ჩვენ შევხვდეთ ისევ კონკურენტულ გარემოში, - ამის შესახებ საქართველოს პარლამენტის თავმჯდომარემ რადიო „იმედის“ ეთერში, 31 ოქტომბრის საპარლამენტო არჩევნების შეფასებისას განაცხადა.

არჩილ თალაკვაძის თქმით, არჩევნებში არალეგიტიმური ჩარევა სწორედ „ნაციონალური მოძრაობის მხრიდან მოხდა.

„როდესაც ისინი საუბრობენ არალეგიტიმურ ჩარევაზე, რაიმე ტიპის დარღვევებზე, პირველ რიგში, არალეგიტიმური ჩარევა ამ არჩევნებში მოხდა სწორედ სააკაშვილის და „ნაციონალური მოძრაობის“ მხრიდან. სააკაშვილი, როგორც სხვა ქვეყნის მოქალაქე, ადამიანი, რომელიც პასუხისგებაში არის მიცემული, არის მსჯავრდებული და ძებნილი, ის ჩაერია, პრაქტიკულად, საქართველოს საარჩევნო პროცესში კანონის დარღვევით, შესაბამისად, ეს იყო ზუსტად არალეგიტიმური ჩარევა და სანამ „ნაციონალური მოძრაობა“ უბნებში და ცალკეულ ოქმებში დაიწყებს რაიმე დარღვევის ძებნას, პირველ რიგში, მათ უნდა შეხედონ, თავად როგორ იქცეოდნენ, როგორ ესხმოდნენ საკუთარი ტელევიზიებით თავს საზოგადოებრივ აზრს, როგორ მონაწილეობდა მათი ლიდერი უკანონოდ საარჩევნო კამპანიაში - სხვა ქვეყნის მოქალაქე სხვა ქვეყნიდან და როგორ ცდილობდნენ ისინი არჩევნების დესტაბილიზაციას წინასწარ. ვერ მიიღეს ეს შედეგი! - ეუთომ, საერთაშორისო დამკვირვებლებმა, ჩვენმა პარტნიორებმა, ევროკავშირმა, ევროპის საბჭომ და ჩვენმა მთავარმა მეგობარმა და სტრატეგიულმა პარტნიორმა, აშშ-მ, პირდაპირ თქვეს, რომ საქართველოში ჩატარდა კონკურენტული არჩევნები და ფუნდამენტური უფლებები იყო დაცული“, - განაცხადა პარლამენტის თავმჯდომარემ.

მისი თქმით, „ქართული ოცნება“ მზადაა მეორე ტურისთვის.

„კანონმდებლობით ჩვენ გაწერილი გვაქვს, თუ რა უნდა მოხდეს მეორე ტურამდე, ცენტრალურ საარჩევნო კომისიას აქვს სრული საკანონმდებლო მხარდაჭერა, რომ ნებისმიერ ცალკეულ ხარვეზში გაერკვეს, გაასწოროს ეს ხარვეზი და მეორე ტურს ჩვენ შევხვდეთ ისევ კონკურენტულ გარემოში. „ქართული ოცნება“ მზად არის მეორე ტურში სამართლიან ბრძოლაში ჩაერთოს, მზად არის გაიმარჯვოს, რისთვისაც არ არის მზად „ნაციონალური მოძრაობა“ და მისი დესტრუქციული მოკავშირეები. მათ იციან წინასწარ, რომ დიდი ალბათობით წააგებენ მეორე ტურებსაც, ამიტომ თავს იზღვევენ დღეს და ამბობენ, რომ მეორე ტურში არ მიიღებენ მონაწილეობას. ეს არის კაპიტულაცია“, - განაცხადა არჩილ თალაკვაძემ.

ოპოზიციური პარტიები აცხადებენ, რომ 2020 წლის საპარლამენტო არჩევნების მეორე ტურში მათი კანდიდატები მონაწელეობას არ მიიღებენ.

საარჩევნო უბნებზე ხმების 100% დათვლილია. შედეგები ასეთია: „ქართული ოცნება“ - 48,22%; „ნაციონალური მოძრაობა - გაერთიანებული ოპოზიცია“ - 27,18%; „ევროპული საქართველო“ - 3.79%; „ლელო“ – 3,16%; „პატრიოტთა ალიანსი“ – 3,14%; „სტრატეგია აღმაშენებელი“ –3,15 %; „გირჩი“ – 2,89%; „ალეკო ელისაშვილი – მოქალაქეები“ – 1,33%; „ლეიბორისტული პარტია“ – 1%. რაც შეეხება დანარჩენ პარტიებს, მათ ამომრჩეველთა ხმების ერთ პროცენტზე ნაკლები აქვთ. საერთაშორისო დამკვირვებლებმა დაადასტურეს, რომ საქართველოში საპარლამენტო არჩევნებზე ფუნდამენტური თავისუფლება და პროცედურების უმეტესობა დაცული იყო.

საერთაშორისო დამკვირვებლებმა დაადასტურეს, რომ საქართველოში საპარლამენტო არჩევნებზე ფუნდამენტური თავისუფლება და პროცედურების უმეტესობა დაცული იყო.

ოპოზიციურმა პარტიებმა კი ოფიციალური დოკუმენტი მიიღეს და ხელმოწერით დაადასტურეს, რომ პარლამენტში არ შევლენ.