გიორგი ხელაშვილი: 7 ნოემბერს „ნაციონალურმა მოძრაობამ“ ადამიანის უფლებები ფეხქვეშ გათელა და მედია თავისუფლება დათრგუნა

დღეს 7 ნოემბერია და 13 წლის წინ „ნაციონალურმა მოძრაობამ“ თავისი სახე საბოლოოდ აჩვენა 7 ნოემბრის აქციის დარბევისას. ამ დარბევამ ნათლად აჩვენა „ნაციონალური მოძრაობის“ მიერ ადამიანის უფლებების ფეხქვეშ გათელვა და მედია თავისუფლების დათრგუნვა, როდესაც გაანადგურა ტელეკომპანია „იმედი“, - ამის შესახებ მმართველი პარტიის ცენტრალურ ოფისში გამართულ ბრიფინგზე „ქართული ოცნების“ პარტიული სიის წევრმა, გიორგი ხელაშვილმა განაცხადა.

მისი თქმით, სამართლებრივად, ამ დარბევის ორგანიზატორების მიერ ჯერ პასუხი არ არის გაცემული, რაც აუცილებლად მოხდება.

„დღეს 7 ნოემბერია და 13 წლის წინ „ნაციონალურმა მოძრაობამ“ თავისი სახე საბოლოოდ აჩვენა 7 ნოემბრის აქციის დარბევისას. ამ დარბევამ ნათლად აჩვენა „ნაციონალური მოძრაობის“ მიერ ადამიანის უფლებების ფეხქვეშ გათელვა და მედია თავისუფლების დათრგუნვა, როდესაც გაანადგურა ტელეკომპანია „იმედი“.

7 ნოემბერი ამიტომ არ არის უცნაური, რომ გახდა „ნაციონალური მოძრაობის“ მმართველობის დასასრულის დასაწყისი, რაც დასრულდა 2012 წელს და საბოლოოდ წერტილი დაესვა მიმდინარე საარჩევნო კამპანიის დროს. ქართველმა ხალხმა ამას მისცა პოლიტიკური შეფასება და ასევე საერთაშორისო საზოგადოებამ ცალსახად ნეგატიური შეფასება დადო ამ მოვლენების შესახებ, თუმცა შეგახსენებთ, რომ სამართლებრივად, ამ დარბევის ორგანიზატორების მიერ ჯერ პასუხი არ არის გაცემული, რაც აუცილებლად მოხდება“, - განაცხადა გიორგი ხელაშვილმა.

2007 წლის 7 ნოემბრის მოვლენებიდან 13 წელი გავიდა. 13 წლის წინ ამ დღეს, გამთენიისას სამართალდამცველებმა თავისუფლების მოედანზე მცირერიცხოვანი აქციის დარბევა დაიწყეს.