იაგო ხვიჩია: საუბრის ალტერნატივა არის ჩხუბი, მე ჩხუბი არ მინდა

ჩემთვის ეს განცხადება მნიშვნელობას იძენს იქედან გამომდინარე, რომ მთავარი ოპოზიციური პარტია, რომელმაც არჩევნებში 27% მიიღო, რას ფიქრობს, ანუ ეს არის მისი ერთ-ერთი ლიდერის კერძო პოზიცია თუ „ნაციონალური მოძრაობის“ პოზიცია, - ასე გამოეხმაურა გრიგოლ ვაშაძის განცხადებას „რუსთავი 2“-ის ეთერში „გირჩის“ ერთ-ერთი ლიდერი, იაგო ხვიჩია.

„ჩემს პოზიციაში არაფერი იცვლება, მე სულ ასე ვფიქრობ, ჩვენ ხალხს არ უნდა დავუკარგოთ რწმენა, რომ ჩვენს ქვეყანაში შესაძლებელია ხელისუფლების შეცვლა არჩევნებით, საუბარს ალტერნატივა არ აქვს, საუბრის ალტერნატივა არის ჩხუბი, მე ჩხუბი არ მინდა“, - განაცხადა იაგო ხვიჩიამ.

დღეს სააგენტო „ნიუპოსტმა“ გრიგოლ ვაშაძის სახელით მისი განცხადება გაავრცელა, სადაც წერია, რომ პროცესები სასწრაფოდ მოლაპარაკების მაგიდასთან უნდა გადავიდეს და ქუჩა ყველა დონის საკანონმდებლო ორგანოს ტრიბუნით ჩანაცვლდეს.

მოგვიანებით, „ნაციონალური მოძრაობის“ თავმჯდომარის ოფიციალურ „ფეისბუქგვერდზე“ ვაშაძის სახელით განცხადება გამოქვეყნდა. რომლის თანახმადაც, თუ მოლაპარაკებები წარმატებით არ დასრულდება, არც მეორე ტურში მონაწილეობას არ მიიღებენ და არც პარლამენტში შევლენ.

თავად გრიგოლ ვაშაძე მედიასთან ამ დრომდე არ გამოჩენილა.

8 ნოემბერს ოპოზიციური პარტიების წარმომადგენლებმა პარლამენტთან საპროტესტო აქცია გამართეს და თავიანთი მოთხოვნები გააჟღერეს. მათ შორის არის: 31 ოქტომბრის არჩევნების შედეგების არალეგიტიმურად ცნობა, რიგგარეშე არჩევნების ჩატარება და ცენტრალური საარჩევნო კომისიის ხელახალი დაკომპლექტება.