ნიკოლოზ სამხარაძის თქმით, ოპოზიციისთვის საპარლამენტო მანდატებზე უარის თქმა დამანგრეველი შედეგის მომტანი იქნება

ეს არის პარლამენტი, რომელმაც უნდა დაამკვიდროს მრავალპარტიულობა საქართველოში, - ამის შესახებ ნიკოლოზ სამხარაძემ „იმედის“ გადაცემაში „არენა“ განაცხადა. „ქართული ოცნების“ პროპორციული სიის წევრის თქმით, ის ელის, რომ მე-10 მოწვევის პარლამენტი მრავალფეროვანი იქნება. მისი თქმით, ოპოზიციური სპექტრის გამოცდილი პოლიტიკოსები - გრიგოლ ვაშაძე და დავით უსუფაშვილი ხვდებიან, რომ დღეს ოპოზიციის მიერ არჩეული გზა თვითიზოლაციისკენ არის გზა არსაით, რაც ამ პარტიებისთვის დამანგრეველი შედეგის მომტანი იქნება.

„ჩვენ გვახსოვს 2008 წლის პარლამენტი, როდესაც იგივე მოხდა. პარტიებმა არ მიიღეს მონაწილეობა, გამოუცხადეს ბოიკოტი და 4 წლის თავზე ის პარტიები უბრალოდ გაქრა. შესაბამისად, ეს ადამიანები გამოცდილი ადამიანები არიან, მოუწოდებენ თავიანთ კოლეგებს და თავიანთ პარტიულ მეგობრებს, რომ ეს ნაბიჯი არ გადადგან. მე ძალიან დიდი იმედი მაქვს, რომ საღი აზრი გაიმარჯვებს, ისინი დაუბრუნდებიან მოლაპარაკებების მაგიდას, იქნება შეთანხმება კონკრეტულ საკითხებზე“, - განაცხადა სამხარაძემ.

მისი თქმით, მცირე პარტიები უნდა მოძლიერდნენ, რომ 2024 წელს 5%-იანი ბარიერის გადალახვა მოახერხონ, ამიტომ მათთვის და ქართული დემოკრატიისთვის მათი პარლამენტში ყოფნა აუცილებელია.

სააგენტო „ნიუპოსტმა“ გრიგოლ ვაშაძის სახელით მისი განცხადება გაავრცელა, სადაც წერია, რომ პროცესები სასწრაფოდ მოლაპარაკების მაგიდასთან უნდა გადავიდეს და ქუჩა ყველა დონის საკანონმდებლო ორგანოს ტრიბუნით ჩანაცვლდეს.

მოგვიანებით, „ნაციონალური მოძრაობის“ თავმჯდომარის ოფიციალურ „ფეისბუქგვერდზე“ ვაშაძის სახელით განცხადება გამოქვეყნდა. რომლის თანახმადაც, თუ მოლაპარაკებები წარმატებით არ დასრულდება, არც მეორე ტურში მიიღებენ მონაწილეობას და არც პარლამენტში შევლენ. განმარტების ეს ტექსტი ვაშაძის „ფეისბუქგვერდზე“ გამოქვეყნებამდე ნიკა გვარამიამ თავის გვერდზე დაპოსტა.

თავად გრიგოლ ვაშაძე მედიასთან ამ დრომდე არ გამოჩენილა.