დავით ბაქრაძე: აშშ-ისა და საქართველოს ურთიერთობის ტრაექტორია აღმავალია და ამის გამოხატულებაა სახელმწიფო მდივნის ვიზიტი

ვიზიტის ფარგლებში, აშშ-ის სახელმწიფო მდივანი კიდევ ერთხელ დაადასტურებს მის მხარდაჭერას საქართველოს ტერიტორიული მთლიანობისადმი, საქართველოს არაღიარების პოლიტიკისადმი, რომლის მთავარი მხარდამჭრი სწორედ აშშ-ია, - ამის შესახებ ტელეკომპანია „იმედის“ გადაცემაში „არენა“ საქართველოს ელჩმა აშშ-ში დავით ბაქრაძემ მაიკ პომპეოს საქართველოში დაგეგმილ ვიზიტზე საუბრისას განაცხადა.

მან ღიმილის მომგვრელი უწოდა ოპოზიციის განცხადებებს, რომ თითქოს აშშ თავის მაღალჩინოსანს საქართველოში ხელისუფლებისთვის შენიშვნების მისაცემად აგზავნის.

„ღიმილის მომგვრელია ასეთი კომენტარები. ამერიკის შეერთებულ შტატებსა და საქართველოს შორის სტრატეგიული პარტნიორობა უმაღლეს ნიშნულზეა. ჩვენი ურთიერთობის ეს ტრაექტორია არის აღმავალი და სწორედ ამის გამოხატულებაა აშშ-ის სახელმწიფო მდივნის ვიზიტი საქართველოში. საქართველოსა და ამერიკის შეერთებულ შტატებს შორის, როგორც უსაფრთხოებისა და თავდაცვის სფეროში თანამშრომლობის მხრივ, საქართველო სამაგალითო პარტნიორია; ასევე, დემოკრატიული განვითარების მხრივ საქართველო არის სამაგალითო ქვეყანა რეგიონში. ასე, რომ აშშ-ის სახელმწიფო მდივანი ამ ვიზიტის ფარგლებში კიდევ ერთხელ დაადასტურებს მის მხარდაჭერას საქართველოს ტერიტორიული მთლიანობისადმი, საქართველოს არაღიარების პოლიტიკისადმი, რომლის მთავარი მხარდამჭრი სწორედ აშშ-ია. ეს იქნება მნიშვნელოვანი გზავნილი ჩვენი ეკონომიკური და სავაჭრო ურთიერთობის კიდევ გაღრმავებისთვის, ამერიკის სექტორისთვის და ჩვენ ერთობლივად ვმუშაობთ უკვე წლებია. საქართველო წარმოადგენს კარგ, საჩვენებელ მაგალითს დემოკრატიული განვითარების მხრივ და რასაკვირველია, მომავალი გეგმები აქედან გამომდინარე იქნება განხილული. ასე, რომ ეს არის ძალიან სასიხარულო ვიზიტი. ჩვენ ყველა მოუთმენლად ველოდით და გვიხარია, რომ ეს ვიზიტი 17-18 ნოემბერს გაიმართება“, - განაცხადა დავით ბაქრაძემ.

17-18 ნოემბერს, საქართველოს აშშ-ის სახელმწიფო მდივანი, მაიკ პომპეო ეწვევა. ვიზიტის ფარგლებში სახელმწიდო მდივანი საქართველოს პრემიერ-მინისტრს, საქართველოს პრეზიდენტს, საქართველოს საგარეო საქმეთა მინისტრსა და საქართველოს კათოლიკოს-პატრიარქს შეხვდება.​