შალვა ნათელაშვილი: მოკავშირეებთან მოლაპარაკებებში ჯერჯერობით ჩართულია ის პარტიები, რომლებმაც „ვითომ გადალახეს ბარიერი“

პოლიტიკური კრიზისის დარეგულირებაში რაც წარმოიშვა არჩევნების მასობრივი გაყალბების შედეგად და რის გამოც ოპოზიციამ უარი განაცხადა პარლამენტში შესვლაზე, ჩაერთვნენ ჩვენი მოკავშირეები, მეგობარი სახელმწიფოები და ამ შემთხვევაში აშშ-ის საელჩო და ევროკავშირის წარმომადგენლობა, - ამის შესახებ „ლეიბორისტული პარტიის“ ლიდერმა შალვა ნათელაშვილმა „ქართული ოცნებისა“ და ოპოზიციური პარტიების ლიდერების მოლაპარაკებების შესახებ განაცხადა.

მისი თქმით, ამ მოლაპარაკებებში ჯერჯერობით ჩართულია ის პარტიები, რომლებმაც, მისი თქმით, ვითომ გადალახეს ბარიერი. ამასთან, მისი თქმით, შეხვედრები გაგრძელდება.

„მე დავაყენე საკითხი, რომ ვინც ვერ გადალახა ბარიერი, ისინიც უნდა მოიწვიონ კონსულტაციების პროცესში. დარწმუნებული ვარ, რომ ბევრმა გადალახა. იქ მიმდინარე საუბრების დეტალიზაცია მოლაპარაკებების თანახმად არ მოხდება მედიასთან, მაგრამ მე შემიძლია სიამაყით ვთქვა, რომ ასეთი ერთიანი ქართული ოპოზიცია, არ მინახავს და ვერ წარმოვიდგენდი“, - აღნიშნა შალვა ნათელაშვილმა.

მისივე თქმით, არჩევნები ბათილად უნდა ჩაითვალოს და 2 თვეში ხელახალი არჩევნები ჩატარდეს. „ხმების გადათვლა ისევე ვერ უშველის ამ პროცესს, როგორც მიცვალებულს რეანიმაცია. ელჩები ვერაფერს დაგვავალებენ, ისინი ახდენენ შუამავლობას და ცდილობენ, რომ მოლაპარაკების მონაწილეთა პოზიციები დაახლოონ ერთმანეთთან და მიიღონ შედეგი, ეს არის მეგობრების პოზიცია. რა შედეგებით დამთავრდება და კონკრეტულად რა მიზანს მივაღწევთ, ეს ახლა ძალიან ძნელია, ვთქვათ. ოპოზიცია პარლამენტში არ შედის, ითხოვს ახალ არჩევნებს“, - განაცხადა შალვა ნათელაშვილმა.

„ქართული ოცნებისა“ და ოპოზიციური პარტიების ლიდერები ევროკავშირისა და აშშ-ის ელჩს ხვდებიან. შეხვედრას ესწრებიან „ლელოს“ გენერალური მდივანი ბადრი ჯაფარიძე, „გირჩის“ ლიდერი ზურაბ ჯაფარიძე, პარტია „მოქალაქეების“ ლიდერი ალეკო ელისაშვილი, „პატრიოტთა ალიანსის“ ლიდერი ირმა ინაშვილი, „ლეიბორისტული პარტიის“ თავმჯდომარე შალვა ნათელაშვილი, „ნაციონალური მოძრაობის“ თავმჯდომარე გრიგოლ ვაშაძე და „ევროპული საქართველოს“ ერთ-ერთი ლიდერი დავით ბაქრაძე.