დავით ბაქრაძე: აშშ-სა და საქართველოს შორის სტრატეგიული პარტნიორობა არის უმაღლეს ნიშნულზე და სწორედ ამის დასტურია მაიკ პომპეოს ვიზიტი საქართველოში

ამერიკის შეერთებულ შტატებში საქართველოს ელჩის, დავით ბაქრაძის განცხადებით, სახელმწიფო მდივნის, მაიკ პომპეოს ვიზიტი არის კიდევ ერთი დასტური იმისა, რომ ამერიკის შეერთებული შტატებსა და საქართველოს შორის სტრატეგიული პარტნიორობა არის უმაღლეს ნიშნულზე.

ელჩის განმარტებით, საქართველო ამერიკის შეერთებულ შტატებთან ყველა მიმართულებით აღრმავებს სტრატეგიულ ურთიერთობებს და ასე გაგრძელდება მომავალშიც.

„ის უმაღლესი დონის შეხვედრები, რომლებიც სახელმწიფო მდივანს ექნება საქართველოში, რასაკვირველია, იქნება მიძღვნილი ჩვენი სტრატეგიული პარტნიორობის ყველა მიმართულების კიდევ უფრო გაღრმავებისკენ. წლების განმავლობაში ჩვენ მივიღეთ ამერიკის შეერთებული შტატებისგან ძლიერი მხარდაჭერა ქვეყნის ტერიტორიული მთლიანობისა და არაღიარების პოლიტიკის მიმართულებით, საქართველოს ევრო-ატლანტიკური ინტეგრაციისა და ქვეყნის განვითარების მიმართულებით. აქედან გამომდინარე, ეს იქნება კიდევ ერთი ძლიერი გზავნილი, რომელსაც სახელმწიფო მდივანი ჩამოიტანს საქართველოში. ჩვენ ვაღრმავებთ ურთიერთობას სტრატეგიული პარტნიორობის ყველა მიმართულებით, იქნება ეს თავდაცვისა და უსაფრთხოების, ეკონომიკური, სავაჭრო, დემოკრატიისა თუ სხვა მიმართულებით. რასაკვირველია, ეს ვიზიტიც არის კიდევ ერთი დასტური იმისა, რომ ამ ურთიერთობის აღმავალი ტრაექტორია გაგრძელდება“,- განაცხადა დავით ბაქრაძემ.

აშშ-ის სახელმწიფო მდივანი მაიკ პომპეო საქართველოს ოფიციალური ვიზიტით 17-18 ნოემბერს ეწვევა.