დავით ბაქრაძე: დარწმუნებულები ვართ, რომ მაიკ პომპეოს ვიზიტი კიდევ უფრო განამტკიცებს ჩვენს ურთიერთობებს

აშშ-ში საქართველოს ელჩმა დავით ბაქრაძემ იმ თემებზე ისაუბრა, რომლებსაც მაიკ პომპეო თბილისში ვიზიტისას შეეხება. როგორც ბაქრაძემ თბილისის საერთაშორისო აეროპორტში შეკრებილ ჟურნალისტებს განუცხადა, აშშ-ის სახელმწიფო მდივნის ვიზიტი საქართველოსა და მთლიანად რეგიონისთვის მნიშვნელოვანი მოვლენაა.

„რეგიონში სტაბილურობისა და უსაფრთხოების მხარდასაჭერად საქართველოს როლის ხაზგასმა იქნება ერთ-ერთი მნიშვნელოვანი საკითხი. ამერიკის შეერთებული შტატები არის ჩვენი ქვეყნის ტერიტორიული მთლიანობის მტკიცე მხარდამჭერი. ამერიკის შეერთებულმა შტატებმა წლების განმავლობაში დაამტკიცა, რომ ის არაღირაების პოლიტიკა, რომელსაც საქართველო ახორციელებს, სწორედ აშშ-ის მტკიცე მხარდაჭერით ხორციელდება. ჩვენ ამის არაერთი მნიშვნელოვანი ფაქტი და დადასტურება გვაქვს, რომელიც გამოიხატება მათ შორის საქართველოს მხარდამჭერი აქტით, გამოიხატება აპროპროაციების აქტით. და რა საკვირველია ველოდებით, რომ ამ ვიზიტით კიდევ ერთხელ ხაზი გაესმევა საქართველოს ტერიტორიული მთლიანობის მხარდაჭერას“, - განაცხადა ბაქრაძემ.

მისივე თქმით, მნიშვნელოვანი დისკუსია გაიმართება თავდაცვისა და უსაფრთოებისა და კორონავირუსით გამოწვეული ეკონომიკური კრიზისის თემაზე. „დარწმუნებული ვართ, რომ ეს ვიზიტი იქნება ისეთივე შედეგიანი და კიდევ უფრო განამტკიცებს ჩვენს ურთიერთობებს, რომელიც დღეს არის უმაღლეს ნიშნულზე“, - დასძინა ელჩმა.