ირაკლი ჩიქოვანი: მაიკ პომპეოს ვიზიტმა ნათელი გახადა, რომ ამერიკული მხარისთვის საქართველოსთან პარტნიორობა მხოლოდ სიტყვები არ არის

ვიზიტმა ნათელი გახადა, რომ ამერიკული მხარისთვის საქართველოსთან პარტნიორობა მხოლოდ სიტყვები არ არის, - ამის შესახებ „ქართული ოცნების“ ზუგდიდის მაჟორიტარი დეპუტატობის კანდიდატმა, ირაკლი ჩიქოვანმა „იმედის“ გადაცემაში „ნამდვილი რიცხვები“ განაცხადა, რომელმაც როგორც კვალიფიციურმა დიპლომატმა აშშ-ის სახელმწიფო მდივნის საქართველოში ვიზიტი შეაფასა.

მისივე თქმით, ამ ვიზიტს აფასებს, როგორც ამ ურთიერთობების შედეგს და ასევე ახალ შესაძლებლობების დასაწყისს.

„ეს არის შედეგი, რომელიც ჩვენ მივიღეთ წლების განმავლობაში გაუმჯობესებული ქართულ-ამერიკული ურთიერთობების ფონზე. წლების განმავლობაში ქართულ-ამერიკული ურთიერთობები ვითარდებოდა, ძლიერდებოდა. მათი შინაარსი ხდებოდა გაცილებით ფართო და ჩვენი ამერიკელი პარტნიორების მხრიდან ყოველწლიურად გაცილებით მეტ დახმარებას ვიღებდით. პარტნიორების მხრიდან, რომლებიც ჩვენი თავდაცვისა და უსაფრთხოების მოდერნიზებაში გვეხმარებოდნენ. წლიდან წლამდე ეს დახმარება იზრდებოდა და მოგეხსენებათ, ბოლო რამდენიმე წლის განმავლობაში სამხედრო შეიარაღებასთან დაკავშირებით ჩვენ გარღვევა გვქონდა. მეორეს მხრივ, ყოველწლიური დახმარების პაკეტი, რომელსაც საქართველოს აქვს, ბოლო წლებში გაიზარდა და მან რეკორდულ მაჩვენებელს მიაღწია“, - განაცხადა ჩიქოვანმა.

მისივე თქმით, მაიკ პომპეოს რეგიონულმა ტურნემ, რომლის დროსაც იგი ვიზიტით ჩამოდი საქართველოში, იმ რეალობის გათვალისწინებით, რაც ბოლო პერიოდში ჩვენს რეგიონში განვითარდა, თვალნათელი გახადა, რომ ამერიკული მხარისთვის საქართველოსთან პარტნიორობა მხოლოდ სიტყვები არ არის.

„ეს არის რეალური საქმე და რეალური სტრატეგია, რომელიც გულისხმობს ჩვენი დასავლური, თავისუფლებასა და დემოკრატიაზე დაფუძნებული ღირებულებების განვითარებას როგორც ჩვენს რეგიონში, ასევე მის მიღმა. ამიტომაც, ჩვენ ვხედავთ ამას. ჩვენ მოგვიწევს კიდევ შრომა იმისთვის, რომ ეს თანამშრომლობა კიდევ უფრო გავაძლიეროთ და რა თქმა უნდა, ამ თანამშრომლობას კიდევ უფრო რეალისტური გამოხმატულებები ჰქონდეს. ამის შესაძლებლობას ჩვენი ორმხრივი ურთიერთობების დინამიკა იძლევა“, - განაცხადა ირაკლი ჩიქოვანმა.

მან ასევე ისაუბრა კიდევ ერთ საკითხზე, რომელიც არჩევნების თემას უკავშირდება. მისივე თქმით, ვიზიტის შემდეგ, ამ საკითხზე აშშ-ის სახელმწიფო მდივნისა და სხვა მაღალი რანგის პირების მიერ არაერთი განცხადება გაკეთდა.

„ძლიან ნათლად იყო მითითებული, რომ საქართველოში ჩატარდა დემოკრატიული და თავისუფალი არჩევნები, რომელსაც ჰქონდა გარკვეული ხარვეზები და ეს ხარვეზები წლიდან-წლამდე აღმოიფხვრება“, - აღნიშნა ჩიქოვანმა.