მარინა კალიურანდი: ძალიან გთხოვთ, აიღეთ თქვენი მანდატი, რომელიც ქართველმა ამომრჩეველმა მოგანიჭათ, შედით და დაიწყეთ მუშაობა პარლამენტში

ჩემი მთავარი გზავნილი ქართველი კოლეგების მიმართ ასეთია - ძალიან გთხოვთ აიღეთ თქვენი მანდატი, რომელიც ქართველმა ამომრჩეველმა მოგანიჭათ და ძალიან გთხოვთ შედით და დაიწყეთ მუშაობა პარლამენტში, - ამის შესახებ „ქრონიკასთან“ ექსკლუზიურ ინტერვიუში ევროპარლამენტში სამხრეთ კავკასიასთან ურთიერთობის დელეგაციის თავმჯდომარე მარინა კალიურანდმა განაცხადა.

ევროპარლამენტის საგარეო ურთიერთობათა კომიტეტის წევრი და ესტონეთის ყოფილი საგარეო საქმეთა მინისტრი ამბობს, რომ ევროპარლამენტი ყოველთვის მხარს დაუჭერს საქართველოში დემოკრატიული რეფორმების გატარებას.

„თქვენ გექნებათ მხარდაჭერა ევროპარლამენტიდან, როგორც ეს ადრე განვაცხადეთ. იმედი მაქვს, რომ გვექნება მჭიდრო ურთიერთობა, წარმატებით ვითანამშრომლებთ პარლამენტის ახალ შემადგენლობასთან. მინდა ქართველმა ხალხმა იცოდეს, რომ მათ ევროპარლამენტში ჰყავთ მეგობრები და მხარდამჭერები. ჩვენ მხარს გიჭერთ დემოკრატიული რეფორმების გატარებაში, ვაღიარებთ, პატივს ვცემთ და ვზრუნავთ თქვენს ევროპულ მისწრაფებაზე. გეხმარებით და მომავალში დაგეხმარებით, რომ ჩვენ ერთად მივაღწიოთ დასახულ მიზნებს, რაც ევროპულ და ევროატლანტიკურ სტრუქტურებში საქართველოს ინტეგრაციაა“, - აცხადებს ევროპარლამენტარი.

18 ნოემბერს მარინა კალიურანდმა საქართველოში შექმნილი პოლიტიკური ვითარების შესახებ განცხადება გაავრცელა, რომელშიც მწუხარება გამოთქვა იმის გამო, რომ ოპოზიციური პარტიები მანდატებზე უარს აცხადებენ და მათ პარლამენტში შესვლისკენ მოუწოდა.

ნიდერლანდელი ევროდეპუტატი ტინი კოქსი, რომელიც არჩევნებზე ევროსაბჭოს საპარლამენტო დელეგაციას ხელმძღვანელობდა, საქართველოს ყოფილი პრეზიდენტის, მიხეილ სააკაშვილის თავდასხმის ობიექტი გახდა. საქართველოს ყოფილი პრეზიდენტი მას „ეფესბეს“ აგენტს უწოდებს და ამტკიცებს, რომ ტინი კოქსი რუსეთის კმაყოფაზე მყოფი დეპუტატია.