ლევან ნიკოლეიშვილი რადიკალურ ოპოზიციაზე: მიჩნდება საფუძვლიანი ეჭვი, რომ ისინი მოლაპარაკების ჩაშლისკენ მიისწრაფვიან

პოლიტიკური პროცესის მთავარი შემადგენელია მოლაპარაკება, დიალოგი. მიუხედავად იმისა, რომ საზოგადოების გარკვეულ ნაწილს დაღლილობაც ეტყობა იმ პროცესების გამო, რომელიც ახლა მიმდინარეობს, სიტუაცია მაინც დადებითია, რადგან გარკვეულმა პროცესებმა ქუჩიდან მაგიდასთან გადაინაცვლა, თუმცა ჩვენ ვხედავთ გარკვეულ მოთამაშეებს, რომლებიც მაქსიმალურად ცდილობენ რადიკალიზაციას და კატეგორიული, აბსურდული სურვილები აქვთ, რაც დაუშვებელია,- ამის შესახებ ანალიტიკოსმა ლევან ნიკოლეიშვილმა ტელეკომპანია „იმედის“ ეთერში, გადაცემაში „არენა“ განაცხადა.

„როგორ შეიძლება, არჩევნების დანიშვნაზე იყოს საუბარი, როდესაც დაახლოებით 2 მილიონმა ადამიანმა მისცა ხმა მმართველ ძალას. რატომ უნდა მოხდეს ამ ადამიანების ხმების გადათვლა და აზრების გადასინჯვა? ეს ყოვლად წარმოუდგენელია. სიტუაცია მაინც იძლევა იმის საფუძველს, რომ დადებითად განვითარდეს ყველაფერი. მიუხედავად იმისა, რომ დღეს, საბოლოო შედეგით, არ გამოვიდა მოლაპარაკება, მაგრამ გაჩნდა იმედი, რომ მოლაპარაკების პროცესი გრძელდება და ამ მხრივ, ვაღიაროთ, რომ არის მზაობა მეორე მხრიდანაც, მაგრამ ეს მზაობა არის გარკვეული სეგმენტისგან და არა იმათგან, ვინც რადიკალიზაციას ცდილობენ. მეტიც, მიჩნდება საფუძვლიანი ეჭვი, რომ ისინი მოლაპარაკების ჩაშლისკენ მიისწრაფვიან. მიუხედავად ამისა, ვხედავთ, რომ ჩვენი სტრატეგიული პარტნიორებისგან, ელჩებისგან, რომლებიც ძალიან დიდ საქმეს აკეთებენ, არის გარკვეული გავლენა. ასევე, უნდა აღინიშნოს, როგორ იქცევა „ქართული ოცნება“, რომელიც მაქსიმალურად ცდილობს, მოლაპარაკების პროცესი კონსტრუქციულად წაიყვანოს და ახალი პაკეტები შესთავაზოს მათ, ზუსტად არ ვიცით, რაზე იქნება საუბარი, მაგრამ, ესაა პაკეტები, რაცაა შესაძლებელი და რაც დაახლოვებს პოლიტიკურ სუბიექტებს“ - განაცხადა ლევან ნიკოლეიშვილმა.

მმართველი გუნდი ოპოზიციასთან მოლაპარაკებებს აშშ-ის ელჩის რეზიდენციაში 12 ნოემბრიდან მართავს.

ახალარჩეული პარლამენტის პირველი სხდომა 11 დეკემბერს გაიმართება.