ირაკლი კობახიძე: მოლაპარაკებებზე, ერთი თუ ორი პარტია ითხოვდა სრულად პროპორციულ სისტემაზე გადასვლას, მაგრამ ეს არ იყო ალეკო ელისაშვილი

არ შეიძლება პარტიული იყოს არჩევნები მუნიციპალურ დონეზე და ამ ელემენტარული პრინციპის წინააღმდეგ ბუნებრივია არავინ არ უნდა წავიდეს, - ამის შესახებ „ქართული ოცნების“ აღმასრულებელმა მდივანმა, ირაკლი კობახიძემ „ღია ეთერში“ განაცხადა.

მისი თქმით, ყველა ქვეყანაში ერთი გამონაკლისის გარდა მოქმედებს ან შერეული, ან მთლიანად მაჟორიტარული საარჩევნო სისტემა.

„ძალიან ბევრ ასპექტს მოიცავს ის პაკეტი, რაც მოლაპარაკების მაგიდის გარშემო განიხილება. საქმე ეხება როგორც საარჩევნო სისტემის საკითხებს, მათ შორის კარს არის მომდგარი ადგილობრივი არჩევნები, 10 თვეში, არც კი ჩატარდება ადგილობრივი თვითმმართველობის არჩევნები. მოლაპარაკებებზე, ერთი თუ ორი პარტია ითხოვდა სრულად პროპორციულ სისტემაზე გადასვლას, მაგრამ ეს არ იყო ალეკო ელისაშვილი, ის პირიქით, წინააღმდეგი იყო. განვითარებულ სამყაროში ერთადერთი ქვეყანაა, სადაც სრულად პროპორციული არჩევნები ტარდება მუნიციპალურ დონეზე, არის ნიდერლანდები. შეიძლება ერთი იყოს კიდევ, უბრალოდ მე არ ვიცი. მთავარი არსი ადგილობრივი თვითმმართველობის არჩევნების არის მაქსიმალური სიახლოვე მუნიციპალურ ორგანოებსა და მოსახლეობას შორის, აქედან გამომდინარე აბსოლუტურად ყველა ქვეყანაში ერთი გამონაკლისის გარდა მოქმედებს ან შერეული სისტემა, ან მთლიანად მაჟორიტარული საარჩევნო სისტემა, მათ შორის იმისთვისაც, რომ დამოუკიდებელ კანდიდატებსაც ჰქონდეთ თვითმმართველობის ორგანოებში მოხვედრის საშუალება. არ შეიძლება პარტიული იყოს არჩევნები მუნიციპალურ დონეზე და ამ ელემენტარული პრინციპის წინააღმდეგ ბუნებრივია არავინ არ უნდა წავიდეს. როდესაც დათმობებზე ვსაუბრობთ და არაერთხელ ვთქვი, რომ დათმობა არ არის სწორი სიტყვა. არ შეიძლება რამეს დათმობა ობიექტური ინტერესების ხარჯზე მოხდეს. თუ მთელ მსოფლიოში აპრობირებულია ის პრინციპი, რომ დამოუკიდებელ კანდიდატებსაც აქვთ თვითმმართველობის ორგანოებში მოხვედრის შესაძლებლობა, არ შეიძლება ჩვენ ამ პრინციპს ვუღალატოთ, თუნდაც რაღაც შეთანხმების ინტერესების გათვალისწინებით. პრინციპებზე იქნება აგებული ჩვენი ყველა შეთავაზება, რომელსაც პარტიებს და საზოგადოებას წარვუდგენთ“, - განაცხადა ირაკლი კობახიძემ.